Կոբի Բրայանտի կինը մեղադրում է օդաչու Արա Զոբայանին ամուսնու և դստեր մահվան մեջ. նա դատի է տվել ուղղաթիռը շահագործող ընկերությանը

ԵՐԵՎԱՆ, 25 փետրվարի./Նովոստի–Արմենիա/. Աշխարհահռչակ բասկետբոլիստ Կոբի Բրայանտի 37–ամյա այրին` Վանեսա Բրայանտը (Vanessa Bryant), վստահ է, որ իր ամուսինը` Կոբին և դուստրը` Ջիաննան, մահացել են օդաչուի մեղքով։

Վանեսան մտադիր է փոխհատուցում ստանալ կործանված ուղղաթիռը շահագործող ընկերությունից, գրում է cosmo.ru–ն։

Լեգենդար բասկետբոլիստի այրին դատական հայց է ներկայացրել Island Express Helicopters ընկերության դեմ։ Վանեսան կարծում է, որ ընկերությունը պետք է պատասխանատվություն կրի օդաչուի անզգույշ գործողությունների համար, որոնք հանգեցրեցին ավիավթարի։


Վանեսայի կարծիքով, օդաչու Արա Զոբայանը, ով մահացել է անձնակազմի մյուսի անդամների հետ միասին, «դրսևորել է անփութություն»։ Դատական հայցում Վանեսան նաև հայտարարել է, որ ընկերությունը թույլ է տվել թռիչք իրականացնել եղանակային վատ պայմանների դեպքում։

Island Express–ի փաստաբանը համաձայն չէ Բրայանտի կնոջ մեղադրանքների հետ։

«Սա ողբերգական դեպք է», – մեջբերել է Թերի Նևիլի խոսքերը Los Angeles Times–ը։

Հիշեցնենք, որ 41–ամյա Կոբի Բրայանտն ու նրա 13–ամյա դուստրը` Ջիաննան, մահացել են հունվարի 26–ին։ Ուղղաթիռը, որում եղել են բասկետբոլիստն ու նրա դուստրը, բախվել է ժայռի։ Ուղղաթիռում գտնվող բոլոր մարդիկ տեղում մահացել են։–0–