ԵՐԵՎԱՆ, 12 մարտի./Նովոստի–Արմենիա/. Թուրինի «Յուվենտուս» ակումբի պաշտպան Դանիելե Ռուգանիի կորոնավիրուսի թեստը դրական պատասխան է տվել։
Այս մասին նշվում է ակումբի պաշտոնական
կայքում։
«Հիվանդությունն ընթանում է առանց ախտանիշների։ Ակումբը հիմա ակտիվացնում է մեկուսացման բոլոր գործընթացները, որոնք պահանջված են օրենքով։ Գրանցվում են այն մարդկանց անունները, ովքեր շփվել են Ռուգանիի հետ», – նշել են ակումբից։
Նշենք, որ Հայաստանում այս պահին գրանցվել է կորոնավիրուսով վարակի 4 դեպք։ Առաջինը գրանցվել էր մարտի 1–ի գիշերը, փետրվարի 28–ից Թեհրանից Երևան ժամանած ՀՀ 29–ամյա քաղաքացու կրկնակի թեստը տվել է դրական արդյունք։ 31 մարդ, ովքեր շփվել են հիվանդի հետ, մեկուսացվել են Ծաղկաձորի «Գոլդեն Փելես» հյուրանոցում։ Մարտի 11–ին կորոնավիրուս է ախտորոշվել ՀՀ երկու քաղաքացիների (45 և 27 տարեկան) և Իտալիայի 51–ամյա քաղաքացու մոտ, ովքեր վերադարձել են Իտալիայից։ Նրանցից մեկը ջերմում է և ունի աջակողմյան բազալ թոքաբորբ, որի կապակցությամբ ստանում է ախտանշանային բուժում:–0–
