Հանրային տրանսպորտում առանց դիմակի երթևեկելը կարգելվի

ԵՐԵՎԱՆ, 14 մայիսի․ /Նովոստի-Արմենիա/․ ՀՀ փոխվարչապետ, արտակարգ դրության պարետ Տիգրան Ավինյանի մամուլի քարտուղար Վահան Հունանյանը հայտնել է, թե երբվանից պետք է դիմակ կրել հանրային տրանսպորտում։

«Տեղեկացնում եմ, որ դիմակներ կրելը հանրային տրանսպորտում պարտադիր է լինելու ոլորտի գործարկմանը զուգընթաց՝ մայիսի 18-ից»,- գրել է նա Facebook-յան իր էջում։

Այսօր ԱԺ արտահերթ նիստի ժամանակ ՀՀ փոխվարչապետ, պարետ Տիգրան Ավինյանը՝ ներկայացնելով արտակարգ դրության ռեժիմի երկարաձգման հարցը, հայտարարեց, որ ՀՀ-ում մայիսի 18-ից հանրային տրանսպորտն ամբողջովին կգործարկվի և կբացվեն առևտրի իրականացման վայրերը: Ինչպես նաև մայիսի 25-ից պարտադիր կդառնա ոչ միայն հանրային փակ, այլև հանրային բաց վայրերում դիմակների կրումը:

Հայաստանում մարտի 16–ին մեկ ամսով հայտարարվել էր արտակարգ դրության ռեժիմ կորոնավիրուսի տարածումը կանխելու նպատակով։ Մարտի 24–ից ապրիլի 12–ը գործում էին մարդկանց տեղաշարժի և տնտեսական գործունեության սահմանափակումներ։ Ապրիլի 13–ին կառավարությունը որոշեց մեկ ամսով երկարացնել արտակարգ դրության ռեժիմը` մինչև 2020թ.–ի մայիսի 14–ը ժամը 17։00–ն։  Մայիսի 14-ին կառավարությունը կրկին երկարաձգել է արտակարգ դրության ռեժիմը՝ մինչև 2020 թվականի հունիսի 13-ը ժամը 17:00-ն ներառյալ:

Հայաստանում մայիսի 14-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 3860 դեպք, որոնցից 1572-ն` առողջացած, 49-ը` մահվան ելքով: -0-