ՀՀ ԱԺ պատգամավորն առաջարկում է խումբ ստեղծել Ղարաբաղում տեղի ունեցած միջադեպը քննելու համար
ԵՐԵՎԱՆ, 2 փետրվարի. /Նովոստի–Արմենիա/. ՀՀ ԱԺ պատգամավոր Նիկոլ Փաշինյանը երկուշաբթի խորհրդարանի նիստի ժամանակ ԱԺ խոսնակ Գալուստ Սահակյանին առաջարկեց խումբ ստեղծել Բերձորում տեղի ունեցած միջադեպը քննելու համար։
«Հիմնադիր խորհրդարան» կազմակերպության անդամները բողոքի ակցիաներ և ավտոերթեր են կազմակերպում` պահանջելով ՀՀ իշխանությունների հրաժարականը։ Շաբաթ օրը ավտոերթ էր կազմակերպվել «100-ամյա տարելիցը` առանց ռեժիմի» կարգախոսով։ Կազմակերպության անդամների տեղեկության համաձայն, Ղարաբաղի տարածք մտնելիս` ոստիկանության աշխատակիցները ծեծի են ենթարկել երթի մասնակիցներից ոմանց։
Գալուստ Սահակյանը խոստացել է այդ հարցը քննարկել ղարաբաղցի գործընկերոջ` Աղոտ Ղուլյանի հետ։
ՀՀԿ–ից պատգամավոր ընտրված Սամվել Ֆարմանյանն էլ նշեց, որ ՀՀ քաղաքացիների հանդեպ դրսևորված ցանկացած բռնություն քննադատման է արժանի, նա ընդգծեց, որ պետք է դիտարկել նաև հարցի մյուս կողմը։
«Ինչպե՞ս կարելի է ապրիլի քսանչորսը դարձնել ժողովրդի պառակտման առարկա: Սա անընդունելի երևույթ է։ Եթե դուք ցանկանում եք պայքարել «ռեժիմի» դեմ, պայքարեք Հայաստանի տարածքում»,– ասաց նա։
ԼՂՀ ոստիկանությունը շաբաթ օրը հայտարարություն էր հրապարակել և նշել, որ սույն թվականի հունվարի 31-ին Հիմնադիր խորհրդարանի անդամների կողմից կազմակերպվել է ավտոերթ դեպի Արցախ, որը բացասական արձագանք է ստացել Արցախի հանրության լայն շրջանակներում, և նրա մի ստվար զանգված որոշել է կանխել ավտոերթի մասնակիցների մուտքը Լեռնային Ղարաբաղի Հանրապետություն։ «Հանդիպելով ավտոերթի մասնակիցներին` ոստիկանության ներկայացուցիչները բացատրական աշխատանքներ են իրականացրել նրանց հետ՝ հորդորելով ետ կանգնել այդ նախաձեռնությունից, քանի որ այն հասարակական լարվածություն է առաջացրել Արցախում։ Սակայն ավտոերթի մի խումբ մասնակիցներ, ի հակադարձումն հորդորների, դիմել են հակաօրինական գործողությունների և շարունակել սադրանքները նաև ոստիկանության նախազգուշացումներից հետո։ Հնարավոր զանգվածային անկարգությունները կանխելու նպատակով ԼՂՀ ոստիկանությունը ստեղծված իրավիճակում ստիպված է եղել դիմել համապատասխան գործողություների` օրենքով իրեն վերապահված լիազորությունների շրջանակներում»,– նշված էր հայտարարության մեջ: -0-
