Իսպանիայում մի քանի լողափ է փակվել «մսակեր բակտերիա» անվամբ հայտնի Vibrio-ի տարածման պատճառով․ Euronews
ԵՐԵՎԱՆ, 24 հունիսի․/Նովոստի–Արմենիա/․ Իսպանիայում ծովի ջրում բակտերիաների, այդ թվում՝ «մսակեր բակտերիա» անվամբ հայտնի Vibrio-ի տարածման պատճառով արդեն փակել են մի քանի լողափեր, գրում է Euronews-ը։
Հրատարակության տվյալներով՝ ջրի ջերմաստիճանի բարձրացման և Եվրոպայի տարբեր ափամերձ շրջաններում զբոսաշրջային ծանրաբեռնվածության ավելացման ֆոնին արձանագրվում են աղտոտման դեպքեր և սանիտարական նախազգուշացումներ, ինչը հանգեցնում է դեպի ծով մուտքի սահմանափակմանը։
Առանձնահատուկ մտահոգություն է առաջացնում Vibrio բակտերիան, որն ապրում է ծովի և աղի ջրերում, հատկապես այն վայրերում, որտեղ գետերը թափվում են ծովը։
Սննդամթերքի անվտանգության եվրոպական գործակալության (EFSA) տվյալների համաձայն՝ Vibrio-ի որոշ շտամեր կարող են առաջացնել ինչպես գաստրոէնտերիտ, այնպես էլ ծանր, այդ թվում՝ մահացու վարակներ։
Փորձագետները նշում են, որ վարակումը հնարավոր է հում ծովամթերք օգտագործելիս, ինչպես նաև բաց վերքերի միջոցով՝ վարակված ջրի հետ շփման դեպքում։
«Բակտերիաները բուն պատմությունը չեն, նրանք միայն դրա սուրհանդակներն են։ Բուն պատմությունը շոգից և աղտոտվածությունից հավասարակշռությունից դուրս եկած ծովն է»,— Euronews-ին նշել է Միջերկրածովյան միության կլիմայի և էներգետիկ կայունության հարցերով վերլուծաբան Հաթիմ Ազնագը։
Հիվանդությունների կանխարգելման և վերահսկման եվրոպական կենտրոնը նախազգուշացնում է ամառային սեզոնին, հատկապես տապի ալիքների ժամանակ և ափամերձ ծանծաղ հատվածներում, Vibrio վարակների բարձր ռիսկի մասին։
