Պակիստանի վարչապետ. ԱՄՆ-ն և Իրանը 24 ժամվա ընթացքում համաձայնագիր կստորագրեն

ԵՐԵՎԱՆ, 13 հունիսի․/Նովոստի-Արմենիա/․ Պակիստանը պատրաստվում է առաջիկա 24 ժամվա ընթացքում ԱՄՆ-ի և Իրանի միջև խաղաղության համաձայնագրի ստորագրմանը։

Այս մասին X սոցիալական ցանցում հայտարարել է երկրի վարչապետ Շահբազ Շարիֆը, գրում է vedomosti-ին։

«Մենք առավել քան երբևէ մոտ ենք խաղաղության համաձայնագրին», – նշել է Շարիֆը։

Վարչապետը հայտնել է, որ համաձայնեցման գործընթացի ավարտից հետո Պակիստանն ակնկալում է կազմակերպել փաստաթղթի էլեկտրոնային ստորագրումը։ Այնուհետև՝ հաջորդ շաբաթ, նախատեսվում է անցկացնել տեխնիկական մակարդակի բանակցություններ դրա իրականացման վերաբերյալ։

Շարիֆը նաև շնորհակալություն է հայտնել ԱՄՆ-ին և Իրանին՝ բանակցային գործընթացին հավատարիմ մնալու համար, և երախտագիտություն է հայտնել տարածաշրջանի պետություններին՝ դիվանագիտական ջանքերին աջակցելու համար։ Նրա խոսքով՝ Իսլամաբադը համոզված է, որ ապագա համաձայնագիրը կարող է ամուր հիմք դառնալ երկարատև խաղաղության համար։

ԱՄՆ-Իրան հակամարտության մասին

Իսրայելը 2026 թ.-ի փետրվարի 28-ին «կանխարգելիչ» հարված էր հասցրել Իրանին: ԱՄՆ նախագահ Դոնալդ Թրամփը հայտարարել էր ամերիկյան ԶՈՒ-ի կողմից Իրանում լայնածավալ մարտական գործողությունների մեկնարկի մասին։

Այնուհետև, ըստ ԱՄՆ նախագահի, կողմերն արդեն փոխըմբռնման են հասել 15 առանցքային կետերի շուրջ, որոնցից հիմնականներն են.

·       Իրանի հրաժարումը միջուկային զենքի մշակումից և ուրանի հարստացումից։

·       Հարստացված ուրանի առկա պաշարների հանձնումը ԱՄՆ-ին։

·       Բացել Հորմուզի նեղուցը։

·       Զսպվածություն հրթիռային ծրագրի հարցում։

ԱՄՆ նախագահ Դոնալդ Թրամփը սույն թվականի մայիսի 24-ին ասել էր, որ խաղաղության պայմանագրի նախագիծը գրեթե համաձայնեցված է։

Հունիսի 9-ին Թրամփը հայտարարել էր, որ Իրանի հետ գործարքը կկնքվի երկու շաբաթվա ընթացքում։

Սույն թվականի հունիսի 13-ին The Telegraph-ը գրել է, որ Միացյալ Նահանգները հապշտապ աշխատում է Իրանի հետ խաղաղության համաձայնագրի վերջնական տեսքի բերման ուղղությամբ՝ մինչև Ֆրանսիայում կայանալիք «Մեծ յոթնյակի» (G7) գագաթնաժողովի մեկնարկը: Գագաթնաժողովը կսկսվի հունիսի 15-ին։ Պարբերականի աղբյուրի փոխանցմամբ՝ պատերազմի դադարեցման և Հորմուզի նեղուցի բացման մասին պայմանավորվածությունը կարող է ստորագրվել արդեն առաջիկա օրերին։

CBS News-ն էլ, հղում անելով իր աղբյուրներին, հայտնել է, որ ԱՄՆ-ն և Իրանը հուշագիրը կստորագրեն արդեն հաջորդ շաբաթվա սկզբին։ Փաստաթղթի ստորագրումից հետո կմեկնարկի բանակցությունների երկամսյա փուլ, որի ընթացքում կողմերը կհամաձայնեցնեն ապագա ամերիկա-իրանական պայմանագրի կոնկրետ կետերը։ Անհրաժեշտության դեպքում այդ ժամանակահատվածը կարող է երկարաձգվել։