Հայտնաբերվել է հունվարի սկզբից որպես անհետ կորած որոնվող 21–ամյա երիտասարդի դին

ԵՐԵՎԱՆ, 21 փետրվարի./Նովոստի–Արմենիա/. Փետրվարի 20-ին ոստիկանության Կոտայքի բաժին հաղորդում է ստացվել, որ Արզնու ձորի տարածքում՝ գետի մեջ, շորի նմանվող լողացող, փքված ինչ-որ իր կա, հնարավոր է՝ դիակ լինի, հաղորդում է ՀՀ ոստիկանությունը:

Նշված վայր օպերատիվ-քննչական խումբ և փրկարարներ են մեկնել: Արզնի գյուղի վարչական տարածքում՝ գետի մեջ, հայտնաբերվել է տղամարդու դիակ՝ առանց արտաքին բռնության հետքերի:

Ձեռնարկված միջոցառումների արդյունքում պարզվել է, որ հունվարի 6-ից ոստիկանության Կոտայքի բաժնի կողմից որպես անհետ կորած որոնվող 21-ամյա Ռոման Բաբայանի դիակն է: Կազմված փաստաթղթերն ուղարկվել են Աբովյանի քննչական բաժին:

 Նշենք, որ 21–ամյա Ռոման Բաբայանը հունվարի 10–ից որոնվում էր որպես անհետ կորած։–0–