ԵՐԵՎԱՆ, 24 մարտի./Նովոստի-Արմենիա/. Մեծ Բրիտանիայի վարչապետ Բորիս Ջոնսոնի կարգադրությամբ երկրում կարանտին է հայտարարվել նվազագույնը երեք շաբաթով, հաղորդում է ՏԱՍՍ-ը:
«Բոլորի համար եկել է ժամանակը սկսելու անել ավելին: Այսօր երեկոյան ես բրիտանացի ժողովրդին շատ պարզ հրահանգ եմ տալիս՝ դուք պետք է մնաք տանը: Դա գլխավորն է, որ մենք պետք է անենք, որպեսզի կանգնեցնենք հիվանդության տարածումը տնային տնտեսությունների միջև: Այդ պատճառով մարդկանց թույլատրվելու է լքել իրենց տները միայն պատճառների սահմանափակ թվով»,- ասել է Ջոնսոնը BBC-ի ուղիղ եթերում:
Ինչպես մեկնաբանել է Ջոնսոնը, թագավորության բնակիչները կարող են խանութ այցելել ամենաանհրաժեշտ ապրանքների համար, ընդ որում դա պետք է անել հնարավորինս հազվադեպ: Մեկ անգամ թույլատրվում է հեռանալ բնակարանից մաքուր օդին սպորտով զբաղվելու համար: Արգելվում է 2-ից ավելի մարդկանց խմբային հավաքույթները, եթե խոսքը նրանց մասին չէ, ովքեր միասին են ապրում:
«[Թույլատրվում է լքել տները] ցանկացած բժշկական պատճառներով՝ բժշկական օգնություն հասցնելու կամ խոցելի մարդկանց օգնելու. աշխատանքի գնալու կամ վերադառնալու համար, բայց միայն այն դեպքում, եթե դա ծայրահեղ անհրաժեշտ է և աշխատանքը չի կարող կատարվել տանից»,- նշել է վարչապետը:
Իսկ կառավարական հրահանգների կատարմանը հետևելու է ոստիկանությունը: Մոտակա օրերին երկրում պետք է ընդունվի օրենք, որն այն կօժտի լրացուցիչ արտոնություններով և կնախատեսի տուգանքներ կարանտինի խախտման համար: Երկրի իշխանությունները հրահանգել են փակել բոլոր խանութները, որոնք առաջին անհրաժեշտության ապրանքներ չեն վաճառում:
Ջոնսոնը հավելել է, որ երկրում դադարեցվելու են բոլոր խմբակային միջոցառումները, ներառյալ հարսանիքները, մկրտությունները և այլ արարողություններ, բացառությամբ թաղման արարողությունների: Կփակվեն մանկական խաղահրապարակները և գրադարանները: Այգիները կմնան բաց, բայց ոստիկանությունը ցրելու է խմբով հավաքող մարդկանց: Այս բոլոր միջոցները ուղղված են հիվանդության տարածումը դանդաղեցնելուն և բրիտանական հիվանդանոցների ծանրաբեռնվածությունը կանխելուն, որովհետև ծանրաբեռնվածությունը կարող է հանգեցնել մահացության աճի:
Երկուշաբթի օրվա դրությամբ, Միացյալ Թագավորությունում հաստատվել է կորոնավիրուսով վարակման 6650 դեպք: Մահերի թիվը հասել է 335-ի, ընդ որում մասնագետները նշում են, որ այդ ցուցանիշն ավելի արագ է աճում, քան Իտալիայում հիվանդության տարածման նույն փուլում:-0-
