Իտալիայի ողջ տարածքում կարանտին է հայտարարվել կորոնավիրուսի պատճառով

ԵՐԵՎԱՆ, 10 մարտի./Նովոստի-Արմենիա/. Իտալիայի Նախարարների խորհրդի նախագահ Ջուզեպպե Կոնտեն հրամանագիր է ստորագրել, ըստ որի, երկրում կորոնավիրուսի տարածման հետ պայքարի նպատակով, սահմանափակվում է երկրի ողջ տարածքում բնակչության տեղաշարժը: ՏԱՍՍ-ի հաղորդմամբ, առանց հարգելի պատճառների խոսքը տեղաշարժի մասին է: Այդպիսիք են աշխատանքային կամ ընտանեկան անհրաժեշտությունը, ինչպես նաև առողջական վիճակով պայմանավորված տեղաշարժերը:

Արգելվում են ցանկացած տեսակի խմբակային հանդիպումները:

Փաստաթղթի ուժի մեջ մտնելով պայմանավորված, դադարեցվում են ցանկացած սպորտային մրցումները, այդ թվում ֆուտբոլի ազգային առաջնությունը: Թույլատրվում են միայն բաց երկնքի տակ՝ Օլիմպիական խաղերին և միջազգային մակարդակի այլ մրցումներին նախապատրաստությունները՝ զգուշության նորմերի պահպանման պայմանով:

Նշվում է, որ կարանտինային միջոցառումները ներկայումս տարածվում են Իտալիայի ողջ տարածքի վրա: Դա ենթադրում է ամեն տեսակ ժամանցային կենտրոնների փակվելը, այդ թվում թանգարանների, թատրոնների և կինոթատրոնների, ինչպես նաև առևտրի կենտրոնների, ռեստորանների և հանրային սննդի այլ կետերի աշխատանքի սահմանափակում, այդ թվում հանգստյան և տոնական օրերին:

Մինչև ապրիլի 3-ը փակ կմնան նաև ուսումնական հաստատությունները:
Հիշեցնենք, որ վերջին տվյալներով Իտալիայում կորոնավիրուսի վարակվածների թիվը գերազանցել է 9 հազարը: Ապաքինվել է ավելի քան 700 մարդ, իսկ մահվան ելքով դեպքերը կազմում է 463: --0--