Բասմաջյան ընտանիքի անդամներին մահացած են գտել Լոս Անջելեսում․ զոհերի թվում են 6 օրական նորածինն ու 2–ամյա փոքրիկը
ԵՐԵՎԱՆ, 29 մայիսի․/Նովոստի–Արմենիա/․ Չորս մարդ, այդ թվում՝ երկու փոքրիկ երեխա, հայտնաբերվել են մահացած Լոս Անջելեսի North Hills թաղամասում տեղի ունեցած սպանության և ինքնասպանության հետևանքով, հայտնում է abc7.com-ը։
Լոս Անջելեսի ոստիկանության աշխատակիցները ժամանել են Londelius Avenue-ում գտնվող տուն չորեքշաբթի ժամը 20:00-ի սահմաններում հրաձգության մասին հաղորդումից հետո: Դեպքի վայրում հայտնաբերվել է հրազենային վնասվածքներով չորս մարդ։
Ավելի ուշ Լոս Անջելեսի տաբժշկական փորձաքննության գրասենյակը պարզել է զոհերից երեքի ինքնությունը՝ 6 օրական Էլլա Բասմաջյան, 2 տարեկան Ալեք Բասմաջյան և 31 տարեկան Խաժակ Բասմաջյան: Մոտ 30 տարեկան կնոջ անունը անմիջապես չի հրապարակվել մինչև հարազատներին տեղեկացնելը:
Լոս Անջելեսի ոստիկանության դեպարտամենտից (LAPD) հայտնել են, որ կասկածյալներ չեն փնտրվում, իսկ գործը հետաքննվում է որպես հաստատված սպանություն-ինքնասպանություն:
Լրացուցիչ մանրամասներ այն մասին, թե ինչ ազգակցական կապ են ունեցել զոհվածները և ինչը կարող էր նախորդել հրաձգությանը, առայժմ չեն բացահայտվում:
Eyewitness News-ի տվյալներով՝ Խաժակ Բասմաջյանը որպես ծրագրային ապահովման ինժեներ աշխատել է BlackLine ընկերությունում։
«Մենք խորապես վշտացած ենք այս ողբերգական կորստով։ Մեր սրտերը բոլոր նրանց հետ են, ում առնչվել է այս կործանարար իրավիճակը: Հարգանքից ելնելով ընտանիքի և շարունակվող հետաքննության նկատմամբ՝ մենք այլևս մեկնաբանություններ չենք անի»,- ասված է BlackLine-ի հայտարարության մեջ։
Դեպքի վայրում հավաքված հարևանները հայտարարել են, որ զոհվածներին համարում են նույն ընտանիքի անդամներ։
Դեպքի վայրում աշխատել են արտակարգ ծառայությունների աշխատակիցները, այդ թվում՝ հրշեջներն ու իրավապահները։ Այնտեղ են ժամանել նաև քաղաքապետի կամավորական ճգնաժամային խմբի անդամները, որն աջակցություն է ցուցաբերում ծանր արտակարգ իրավիճակներ վերապրած մարդկանց:
