ԵՐԵՎԱՆ, 21 մարտի․ /Նովոստի-Արմենիա/․ Մինչև ապրիլի 21-ը կորոնավիրուսի տարածման սպառնալիքի պատճառով Վրաստանում սահմանվում է արտակարգ իրավիճակ, այս մասին շաբաթ օրը հայտնել է երկրի վարչապետ Գեորգի Գախարիան:
«Վրաստանի կառավարությունն այսօր կդիմի նախագահին՝ մեկ ամսով՝ մինչև ապրիլի 21-ը, ամբողջ երկրում սահմանել արտակարգ իրավիճակի ռեժիմ», - ասել է Գախարիան, հաղորդում է ՏԱՍՍ-ը :
Ինչպես շեշտել է Վարչապետը, արտակարգ իրավիճակի ռեժիմը ենթադրում է հետևյալ միջոցները. «Մարդը, ով կխախտի կարանտինի կանոնները, հարկադրաբար կտեղափոխվի համապատասխան հաստատություն, և նրա նկատմամբ կկիրառվեն պատժամիջոցներ», կներդրվեն օդային և ցամաքային փոխադրման սահմանափակումներ, բացառությամբ՝ բեռի, վրացական կառավարությանը թույլատրվում է «անհրաժեշտության դեպքում սահմանափակել սեփականության իրավունքը և օգտագործել ֆիզիկական և իրավաբանական անձանց գույքը կարանտինի կամ մեկուսացման համար »: Բացի այդ, «սահմանափակվում է մինչև 10 հոգով մարդկանց կուտակումը»:
Վարչապետի խոսքով, արտակարգ իրավիճակի ռեժիմի ժամանակ կառավարությունը իրավունք կունենա «պարտավորեցնել մասնավոր կազմակերպություններին և գործարար կառույցներին իրականացնել հատուկ գործողություններ»: Կառավարությունը, անհրաժեշտության դեպքում, կկարողանա ամենուրեք մոբիլիզացնել բժշկական և կրթական ոլորտում աշխատող մարդկանց։
«Անհատների կամ իրավաբանական անձանց կողմից արտակարգ իրավիճակի ռեժիմի խախտումը ենթադրում է վարչական պատասխանատվություն», - ասել է վարչապետը: Ֆիզիկական անձանց համար տուգանքը կկազմի 3 հազար լարի, իսկ իրավաբանական անձանց համար ՝ 15 հազար լարի: Կրկնված խախտումը ենթադրում է քրեական պատասխանատվություն մինչև 3 տարի:
Վրաստանի նախագահ Սալոմե Զուրաբիշվիլին շաբաթ օրը աջակցեց երկրի վարչապետ Գեորգի Գախարիայի` կորոնավիրուսի տարածման սպառնալիքի պատճառով երկրում արտակարգ դրություն սահմանելու առաջարկությանը:
«Հիմնվելով Վարչապետի ներկայացման և Սահմանադրության 71-րդ հոդվածի վրա, ես որոշում եմ կայացնում և հայտարարում եմ արտաարգ իրավիճակ ամբողջ Վրաստանում: Այս որոշումն ուժի մեջ է մտնում անմիջապես», - ասել է Զուրաբիշվիլին:-0-
