Ռուսաստանն առաջ է անցել Չինաստանից կորոնավիրուսով հիվանդացածների թվով
ԵՐԵՎԱՆ, 27 ապրիլի./Նովոստի–Արմենիա/. Ռուսաստանում մեկ օրում գրանցվել է կորոնավիրուսով վարակման ևս 6 198 դեպք, հաղորդում է BBC–ի ռուսական ծառայությունը` հղում անելով կառավարությանն առընթեր օպերատիվ շտաբին։
Մահացել է ևս 50 մարդ։ Ռուսաստանը կորոնավիրուսով հիվանդացածների թվով անցել է Չինաստանից և հայտնվել 9–րդ տեղում։
Վարակի ողջ ընթացքում Ռուսաստանում մահացել է 794 մարդ։
Մոսկվայում մահացել է կորոնավիրուսով վարակված 31 պացիենտ, ովքեր ունեցել են թոքաբորբ։ Քաղաքում կորոնավիրուսից մահացածների թիվը գերազանցել է 400–ը, այս պահին գրանցվել է 45 351 դեպք, տեղեկացրել է քաղաքի օպերատիվ շտաբը։
Մոսկվայում 349 պացիենտ մահացել է կորոնավիրուսից, առողջացել է ընդհանուր առմամբ 3 524 մարդ, հայտարարել է Մոսկվայի փոխքաղաքապետ Անաստասիա Ռակովան։
Մեկ շաբաթում` ապրիլի 19–ից 26–ը, ՌԴ–ում կորոնավիրուսով վարակվածների թիվն ավելացել է 88,9%–ով` 42 853–ից հասնելով 80 949–ի, ամենօրյա աճը տատանվում է 6,3 հազարից մինչև 1,9 հազարի սահմանում։
ՌԴ ՊՆ–ն նախօրեին երեկոյան առաջին անգամ հայտնել է Զինված ուժերում վարակվածների թիվը։ Ըստ տվյալների, մարտից ապրիլի 26–ն ընկած ժամանակահատվածում թեստավորման ընթացքում կորոնավիրուս է ախտորոշվել 874 զինծառայողի մոտ, 4 զինծառայողի վիճակը ծանր է։ Կորոնավիրուս է ախտորոշվել նաև 799 կորսանտների և ռազմական բուհերի ուսանողների մոտ։
«Ռուսաստանը մայիսյան տոները պետք է նշի տանը, որպեսզի կանխվի կորոնավիրուսի պայթյունային տարածումը», – նախօրեին հայտարարել է Ռոսպոտրեբնադզորի ղեկավար Աննա Պոպովան։
Նրա խոսքով, Ռուսաստանին դեռ հաջողվում է խուսափել հիվանդության պայթյունային զարգացումից։
«Մենք ոչ մի պիկ չենք տեսնում։ Պիկը պայթյուն է։ Պայթյուն մեզ մոտ չկա», – ասել է նա «Ռոսիա 1»–ի եթերում։
Ռոսպոտրեբնադզորի տվյալներով, արդեն իրականացվել է ավելի քան 3մլն լաբորատոր հետազոտություն, վերջին օրվա ընթացքում` ավելի քան 139 հազար թեստ։
«Ռուսաստանը մայիսի կեսին կհայտնվի կորոնավիրուսի հիվանդացության բարձունքի վրա, հունիսին ավելի թեթև կլինի», – հայտարարել է ՌԴ նախագահի մամուլի քարտուղար Դմիտրի Պեսկովն «Аргументы и факты»–ին տված հարցազրույցում։
«Եկեք նայենք Իտալիային, Իսպանիային։ Դինամիկան քիչ, թե շատ համադրելի է։ Որքա՞ն է այնտեղ տևել կրիտիկական փուլը։ Ամենաշատը մեկուկես ամիս։ Եվ մոտավորապես մայիսի կեսին մենք ևս պետք է հայտնվենք բարձունքի վրա», – նշել է Պեսկովը։
«Իսկ հետո, ամռան առաջին ամսում, երևի, ավելի հեշտ կլինի։ Եվ այս բոլոր դժվարություններն արագ կմոռացվեն», – հուսադրել է Պեսկովը։–0–
