Իրանի՝ կանանց և ընտանիքի հարցով փոխնախագահի մոտ կորոնավիրուս է հայտնաբերվել

ԵՐԵՎԱՆ, 27 փետրվարի. /Նովոստի-Արմենիա/. Իրանի՝ կանանց և ընտանիքի հարցով փոխնախագահ Մասումե Էբտեկարի կորոնավիրուսի թեստի բատասխանը դրական է եղել: Այս մասին հայտնում է «ՏԱՍՍ»-ը՝ հղում անելով IRNA կայքին:

Նշվում է, որ Էբտեկարը անալիզ է հանձնել չորեքշաբթի, իսկ պատասխանը ստացել է հինգշաբթի առավոտյան, որից հետո որոշում է կայացրել տնային կարանտինով անցնել:


Իրանի առողջապահության նախարարությունը փետրվարի 19–ին հայտնել է երկրում նոր կորոնավիրուսի վարակի առաջին դեպքերի մասին։ Վարակվածները հայտնաբերվել են Կում քաղաքում։ Պաշտոնական տեղեկատվության համաձայն, Իրանում կորոնավիրուսով վարակվել է մոտ 95 մարդ, 15–ը մահացել է։–0–