Հայաստանի ազգային ֆիլհարմոնիկ նվագախումբը ելույթ կունենա Իրանի Պերսեպոլիսի համալիրի տարածքում
ԵՐԵՎԱՆ, 20 օգոստոսի․/Նովոստի-Արմենիա/․ Հայաստանի ազգային ֆիլհարմոնիկ նվագախմբի 100-ամյակի կապակցությամբ հոբելյանական միջոցառում-համերգը տեղի կունենա Իրանի ամենահայտնի տեսարժան վայրերից մեկի՝ Պերսեպոլիսի համալիրի տարածքում։
Այս հարցը քննարկվել է նախօրեին ՀՀ կրթության, գիտության, մշակույթի և սպորտի նախարար Ժաննա Անդրեասյանի և Իրանի Իսլամական Հանրապետության մշակութային ժառանգության, զբոսաշրջության և ձեռարվեստի նախարար Սեյեդ Ռեզա Սալեհի Ամիրիի գլխավորած պատվիրակության հետ հանդիպման ժամանակ։
«Սա բացառիկ իրադարձություն է և կնպաստի ոչ միայն Հայաստանի մշակութային ժառանգության հանրահռչակմանը, այլև Հայաստանի և Իրանի միջև բարեկամական հարաբերությունների խորացմանը։», - Անդրեասյանի խոսքերն է մեջբերում ԿԳՄՍ նախարարության մամուլի ծառայությունը։
