Զովունիում հայտնաբերվել է մոտ 4,5 կգ մարիխուանա․ ձերբակալվել են 46-ամյա և 72-ամյա անձինք (ՎԻԴԵՈ)
ԵՐԵՎԱՆ, 22 մայիսի․/Նովոստի–Արմենիա/․ Քրեական ոստիկանության թմրամիջոցների անօրինական շրջանառության դեմ պայքարի վարչությունում ստացված օպերատիվ տեղեկությունների հիման վրա կանխվել է մաքսանենգ ճանապարհով առանձնապես խոշոր չափերի թմրամիջոցների տեղափոխումը Հայաստան։
Օպերատիվ տեղեկություններն իրացվել են Քննչական կոմիտեի տնտեսական հանցագործությունների և մաքսանենգությունների քննության գլխավոր վարչության ծառայողների և Կոտայքի մարզի պարեկների համատեղ գործողությունների արդյունքում։
Մայիսի 19-ին՝ ժամը 17․45-ին, Կոտայքի մարզի Զովունի գյուղի դիմացի դաշտամիջյան հատվածում ձերբակալվել են «Հյունդայի» մակնիշի ավտոմեքենայի 46-ամյա վարորդն ու 72-ամյա ուղևորը։ Նրանք մեքենայով հանդերձ տեղափոխվել են Համայնքային ոստիկանության Դավթաշենի բաժին։
Տղամարդու խուզարկությամբ հայտնաբերվել է պոլիէթիլենային փաթեթ՝ մոտ 4,5 կիլոգրամ մարիխուանայով։ Ավտոմեքենան տեղափոխվել է պահպանվող հատուկ տարածք։
Նախաքննությամբ դեպքի հանգամանքները պարզվում են։
