ՖԱՖ - Ռուբեն Հայրապետյան հակամարտությունը թեժանում է

ԵՐԵՎԱՆ, 9  նոյեմբերի. /Նովոստի–Արմենիա/ «ՖԱՖ կոչվող խմբակին խորհուրդ կտամ զբաղվել տուրիստական գործունեությամբ» ի պատասխան FAF –ի պահանջների` հայտարարել է ՀՖՖ նախագահ Ռուբեն Հայրապետյանը, Հայաստանի ֆուտբոլի ֆեդերացիայի պաշտոնական կայքում:

Նոյեմբերի 8-ին երկրպագուների First Armenian Front շարժումը (FAF) հայտարարել էր, որ մտադիր է երթ կազմակերպել դեպի Հայաստանի ֆուտբոլի ֆեդերացիայի շենք` ՀՖՖ–ի նախագահից պահաջնելով բացատրություններ ազգային հավաքականի անհաջող խաղի կապակցությամբ:

Հայ երկրպագուները բացատրություններ են պահանջում ՀՖՖ–ից հավաքականի անհաջող խաղի կապակցությամբ>>

«ՖԱՖ կոչվող խմբակը լավ կլինի, որպեսզի գիտակցի, որ Հայաստանի հավաքականն ունի հարյուր հազարավոր հավատարիմ երկրպագուների բանակ ինչպես Հայաստանում, այնպես էլ ամբողջ աշխարհում, որոնք իսկապես Հայաստանի ազգային հավաքականի և հայկական ֆուտբոլի կողքին են ամեն պարագայում: Նրանք իրենց չեն ծառայեցնում տարբեր շահերի, ոչ մաքուր հանձնարարություններ չեն կատարում, հավաքականն ու ֆուտբոլը չեն ծառայեցնում իրենց մանր ամբիցիաներին: Նրանք միշտ և հատկապես հավաքականի համար վճռորոշ պահերին մեր ազգային հավաքականի հետ են և մենք ամեն ինչ անելու ենք որ մեր հավաքականը վերագտնի իրեն արժանի խաղը»,-սաված է ՀՖՖ նախագահի պատասխան-հայտարարությունում :

Հիշեցնենք, որ FAF–ի ակտիվիստները հայտարարել էին, թե «մինչև նոյեմբերի 16-ը ՀՖՖ-ի կողմից պատասխան չլինելու դեպքում ՖԱՖ-ը Արամ Խաչատրյանի արձանի մոտից կիրականացնի երկրպագուների երթ դեպի Խանջյան փողոց՝ Հայաստանի Ֆուտբոլի ֆեդերացիա՝ պատասխան իմանալու և տեր կանգնելու ներկայացված պահանջներին»։

Ի պատասխան FAF–ի հայտարարության` ՀՖՖ-ը նախագահը զարմանք է արտահայտել, որ պահանջատիրությունը կապված է Հայաստանի ազգային հավաքականի և Հայաստանի ֆուտբոլի ֆեդերացիայի հետ: «Ես կարծում էի, որ ՖԱՖ կոչվող խմբակը պահանջատիրական հակումներ կարող է ունենալ օրինակ, ասենք Իտալիայի ազգային հավաքականի կամ Իտալիայի ֆուտբոլի ֆեդերացիայի նկատմամբ: Բոլորն են հիշում, թե ինչ ջերմությամբ ու մտահոգությամբ էին նրանք երկրպագում օրինակ Իտալիայի ազգային հավաքականին: Ընդհանրապես ՖԱՖ կոչվող խմբակը մինի շոուներ կազմակերպելու մեծ փորձ ունի, բայց Հայաստանի ազգային հավաքականի համար վճռորոշ պահերին օտար երկրների հավաքականներին երկրպագելու մասով».-ասված է հայտարարությունում:

Եվ, որպես եզրահանգում ՀՖՖ նախագահն ընդծել է.«Հայաստանի ֆուտբոլի ֆեդերացիան և ես անձամբ բազմիցս ենք արտահայտել մեր երախտագիտությունը մեր հավատարիմ հարյուր հազարավոր երկրպագուներին: Մենք ամեն ինչ անելու ենք, որպեսզի մեր ազգային հավաքականը նրանց վերադարձնի իրենց նվիրումը: Հայաստանում և արտերկրում Հայաստանի ազգային հավաքականի երկրպագուների բազմաթիվ կազմակերպություններ կան, որոնց նաև շնորհակալ ենք իրենց աշխատանքի, դիտողությունների և խորհուրդների համար: Որևէ խմբակի իրավունք չի տրված խոսել ազգային հավաքականի բոլոր երկրպագուների անունից»:-0-