ԵՐԵՎԱՆ, 10 մարտի. /Նովոստի-Արմենիա/. Իրանում առնվազն 27 մարդ մահացել է մեթիլսպիրտից՝ օգտագործելով այն որպես կորոնավիրուսից պաշտպանվելու միջոց: Այս մասին հայտնում է
esquire.ru-ն՝ հղում անելով Al Jazeera-ին:
Ընդհանուր առմամբ՝ ալկոհոլային թունավորմամբ 218 մարդ է հոսպիտալացվել: Որոշ տուժածներ կորցրել են տեսողությունը: Իշխանությունները չեն բացառում, որ մեթանոլից մահերի թիվը կավելանա:
Թե ինչո՞ւ են մարդիկ արդյունաբերական սպիրտ օգտագործել, չի նշվում: Հավանաբար դա կապված է նրա հետ, որ երկրում, առհասարակ, արգելվում է ալկոհոլի օրինական վաճառքը:
Մերձավոր Արևելքի բոլոր երկրներից Իրանում կորոնավիրուսի տարածման ամենածանր իրավիճակն է: Վերջին տվյալներով՝ մարտի 10-ի առավոտյան վարակվածների թիվը հասնում է 7161-ի, մահացածներինը՝ 237: Իրանի դեմ միջազգային պատժամիջոցներն ուղղակիորեն ազդում են դեղագործական արդյունաբերության վրա, ինչի պատճառով երկիրը դեղերի պակաս է զգում:
Մարտի 10-ի առավոտյան ստացված տվյալների համաձայն՝ աշխարհում կորոնավիրուսով վարակվել է ավելի քան 113 հազար մարդ, ապաքինվել՝ գրեթե 64 հազարը: Զոհերի թիվը գերազանցել է 4 հազարը: -0-
