ԵՐԵՎԱՆ, 3 հունիսի./Նովոստի-Արմենիա/. Աշխարհում գոյություն ունի բացահայտ վտանգ COVID-19-ի կրկնակի բռնկման, որը կարող է ավելի կործանարար լինել: Այս մասին ռուսալեզու ԶԼՄ-ների համար COVID-19-ի հարցերով առցանց ճեպազրույցի ժամանակ հայտնել է ԱՀԿ Եվրոպայի տարածաշրջանային տնօրեն Հանս Քլյուգեն:
Загружается новость ... "Лево"
ԱՀԿ-ն մարտի 11-ին նոր կորոնավիրուսային COVID-19-ը վարակի բռնկումը համավարակ է հայտարարել: ԱՀԿ-ի վերջին տվյալներով, աշխարհում ընդհանուր առմամբ հայտնաբերվել է վարակի 6,1 մլն. դեպք, ավելի քան 376 հազ. մարդ մահացել է:
«Երկրորդ ալիքն անխուսափելի չէ: Սակայն ավելի մեծ թվով երկրներ հանում են սահմանափակումները: Եթե չկանխենք այդ բռնկումները, ապա երկրորդ ալիքը կարող է վրա հասնել, և այն կարող է ավելի կործանարար լինել»,- նշել է Քլյուգեն:
Նրա խոսքով, կառավարություններին անհրաժեշտ է շատ զգուշությամբ հանել սահմանափակումները և մշտապես հետևել իրավիճակին, քանի որ ինչպես նախկինում, այնպես էլ հիմա, կորոնավիրուսի դեմ պատվաստանյութ չկա:
«Ներկա պահին եվրոպական տարածաշրջանը հաշվարկում է COVID-19-ի ավելի քան 2,2 մլն դեպք, մահացել է ավելի քան 181 հազ. մարդ: Չնայած այն բանին, որ դեպքերի ամենօրյա թիվը կիսով չափ կրճատվել է ապրիլի համեմատ, վտանգը մեծ է մնում»,- նշել է նա:
Ինչպես նշել է Քլյուգեն, համավարակի առաջին ալիքից հետո պարզ է դարձել, թե դրա կանխարգելմանն ուղղված որ միջոցառումներն են ավելի արդյունավետ, կառավարություններն ինչը պետք է հաշվի առնեն:
«Լավ լուրն այն է, որ առաջին ալիքից հետո մենք շատ բան սովորեցինք: Եթե նոր ալիքի բռնկում լինի, ապա մենք ավելի լավ պատրաստված կլինենք, ավելի լավ կհասկանանք վարակը, որ միջոցառումներ են արդյունավետ և ինչպես պատրաստվենք»,- հայտնել է նա:
Կորոնավիրուսային իրավիճակը Հայաստանում
Հունիսի 3-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 10524 դեպք, որոնցից 3454-ն` առողջացած, 170-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 6841 պացիենտ: Ընդհանուր առմամբ կատարվել է 61650 թեստավորում: -0-
