Վրաստանի խոշորագույն բանկերը թույլ են տվել հաճախորդներին 3 ամիս չվճարել վարկերը

ԵՐԵՎԱՆ, 13 մարտի. /Նովոստի-Արմենիա/. Վրացական TBC Bank-ը և Վրաստանի Բանկը ֆիզիկական և իրավաբանական անձանց թույլ են տվել ժամանակավորապես չվճարել վարկերը, հաղորդում է «Իզվեստիա»-ն՝ նշելով, որ այդ մասին մարտի 13-ին հայտնել են ֆինանսական հաստատությունները:

Ինչպես հայտնել են TBC Bank-ում, որոշումը կայացվել է 3 ամիս ժամկետով:

«Մենք որոշում ենք կայացրել վարկերի վճարման եռամսյա արտոնյալ ժամանակաշրջան առաջարկել ֆիզիկական անձանց, միկրո, փոքր և միջին բիզնեսին, ինչպես նաև բոլոր այն բիզնեսներին, որոնք գործում են զբոսաշրջության, սննդի և այնպիսի ոլորտներում, որոնք մարդաշատ վայրեր են ենթադրում»,- նշել են բանկում:

Վրաստանի Բանկը նշել է, որ մարտի 13-ից՝ երեք ամիս, այն սպառողները, ովքեր պետք է մարեին վարկերը, կկարողանան հետաձգել իրենց վճարումը մինչև մայիս:

Մարտի 13-ի դրությամբ Վրաստանում գրանցվել է կորոնավիրուսով վարակման 25 դեպք: Մեկուսացման մեջ է գտնվում 245 մարդ, ևս 58-ը հոսպիտալացվել են: Առաջին դեպքը գրանցվել է փետրվարի 26-ին: