«Viva Hayastan». ապշեցնող հայկական շոու` բրազիլական կառնավալի ժամանակ (ՖՈՏՈ, ՎԻԴԵՈ)

ԵՐԵՎԱՆ, 4 մարտի. /Նովոստի-Արմենիա/. Սան Պաուլուում բրազիալական հայտնի կառանավալի ժամանակ երկուշաբթի ներկայացվել է Հայաստանին նվիրված շքեղ «Viva Hayastan» շոուն, հայտնում է Հայաստանի ԱԳՆ մամուլի ծառայությունը։

Ինչպես նշվում է հաղորդման մեջ, ծրագիրն իրականացվել է Բրազիլիայում Հայաստանի դեսպանության աջակցությամբ և հայկական համայնքի ակտիվ մասնակցությամբ։



Ներկայացումը կազմակերպել են «Ոսկե վարդեր» Սան Պաուլուի սամբայի դպրոցը, որի տնօրեն Անժելիկա Բազիլիոսը նախապատրաստական փուլում Հայաստանի դեսպան Աշոտ Գալոյանի հրավերով այցելել է Հայաստան և մասնակցել համապատասխան գերատեսչությունների ղեկավարների, ազգագրագետների և լրատվամիջոցների ներկայացուցիների և հետ։



Ծրագրի սցենարի հեղինակ Անդրե Մաշադոնը, դիմելով հայոց պատմության կարևոր դրվագներին, սկսած Նոյ նահապետիս մինչև ժամանակակից Հայաստան, դեկորացիաների և գունեղ հայկական տարազների, եռագույնի և զինանշանի միջոցով ներկայացրել է հայկական հնագույն մշակույթն ու վերածնված Հայաստանը։



Կառնավալի ընթացքում հնչել է «Viva Hayastan» երգը, որը գրվել է հատուկ այդ առիթով։ Երգում փառաբանվում է Հայաստանի և Բրազիլիայի բարեկամությունը, ինչպես նաև հայ ժողովուրդը։

Կարևոր է նշել, որ Բրազիլիայի Globo ամենախոշոր լրատվամիջոցի լրագրողները մանրամասն լուսաբանել են այդ ներկայացումը` առանձին անդրադառնալով Հայոց ցեղասպանության թեմային և այն վերապրած մարդկանց ճակատագրին, որոնց մի մասը բնակություն է հաստատել Սան Պաուլուում և մեծ դեր խաղացել երկրի բարգավաճման մեջ։ -0-