Եվրախորհրդարանը Ադրբեջանի ավելի քան 300 քաղբանտարկյալների վերաբերյալ բանաձևում հիշատակել է հայ գերիներին
ԵՐԵՎԱՆ, 9 հոկտեմբերի․ /Նովոստի-Արմենիա/․ Եվրախորհրդարանը հոկտեմբերի 8-ին ընդունել է Ադրբեջանում քաղբանտարկյալների ազատ արձակման վերաբերյալ բանաձև, որում հիշատակվում են նաև Բաքվում պահվող հայ գերիները։
Բանաձևի ընդունմանը կողմ է քվեարկել 492 պատգամավոր, դեմ՝ 23-ը, ձեռնպահ՝ 60-ը։
Փաստաթուղթը վերաբերում է ադրբեջանցի ընդդիմադիր գործիչներ Ալի Քերիմլիի, Անար Մամեդլիի և այլ քաղբանտարկյալների գործերին։
Բանաձևում նշվում է, որ Ադրբեջանում կա ավելի քան 300 քաղբանտարկյալ։ Եվրախորհրդարանը վճռականորեն դատապարտել է նրանց շարունակվող կալանավորումն ու ազատազրկումը քաղաքական դրդապատճառներով՝ կոչ անելով անհապաղ և անվերապահ ազատ արձակել նրանց։
Հայ գերիները փաստաթղթում հիշատակվում են Ադրբեջանի քաղբանտարկյալների ընդհանուր համատեքստում։ Փաստաթղթում հայ գերիներին ազատ արձակելու առանձին պահանջ ներկայացված չէ։
Բաքվում հայ գերիների մասին
2026 թվականի փետրվարի 5-ին Բաքվի դատարանը ցմահ ազատազրկման է դատապարտել Արցախի նախկին նախագահ Արայիկ Հարությունյանին, Պաշտպանության բանակի նախկին հրամանատարներ Լևոն Մնացականյանին և Դավիթ Մանուկյանին, խորհրդարանի նախկին խոսնակ Դավիթ Իշխանյանին և ԱԳ նախկին ղեկավար Դավիթ Բաբայանին։
Լեռնային Ղարաբաղի նախկին նախագահներ Արկադի Ղուկասյանը և Բակո Սահակյանը դատապարտվել են 20-ական տարվա ազատազրկման։ Ցմահ ազատազրկում նրանց նկատմամբ չի կիրառվել տարիքի պատճառով. երկուսն էլ 65-ից բարձր են։
Փետրվարի 17-ին 20 տարվա ազատազրկման է դատապարտվել նաև Լեռնային Ղարաբաղի նախկին պետնախարար Ռուբեն Վարդանյանը։ Նրա պաշտպանությունը հերքել է մեղադրանքները և հայտարարել արդար դատաքննության իրավունքի խախտման մասին։
Ադրբեջանում պահվող հայ ռազմագերիների և քաղաքացիական անձանց ստույգ թիվն անհայտ է։
Բաքվում հայտարարում են շուրջ 30 պահվող հայերի մասին, մինչդեռ հայաստանյան իրավապաշտպան կազմակերպությունները պնդում են, որ նրանց փաստացի թիվը կարող է մոտ 80-ով ավելի լինել։
