Թուրք քաղաքական գործիչներին առաջարկվել է լքել Հայաստանի տարածքը. ԱԱԾ

«Հզոր Թուրքիա» կուսակցության նախագահ Թունա Բեքլևիչին և նրա տեղակալ Բայքարս Օրսեկին առաջարկվել է լքել Հայաստանի տարածքը, ուրբաթ հաղորդում է ՀՀ ազգային անվտանգության ծառայությունը։

««Հզոր Թուրքիա» կուսակցության նախագահ Թունա Բեքլևիչը և նրա տեղակալ Բայբարս Օրսեկը հոկտեմբերի 11-ին տարբեր ԶԼՄ-ներում, այդ թվում՝ էլեկտրոնային, տեղեկություն են տարածել, որ նրանք անօրինական ճանապարհով անցել են Հայաստանի պետական սահմանը՝ հայ-թուրքական սահմանի բացման խնդրին իշխանությունների ուշադրությունը գրավելու նպատակով»,- ասվում է հաղորդագրության մեջ։

Ինչպես տեղեկացվում է հաղորդագրության մեջ, ՀՀ ԱԱԾ-ը և Հայաստանում ՌԴ ԴԱԾ ՍՎ հետ համատեղ ձեռնարկվել էին համապատասխան միջոցառումներ, որոնց արդյունքում օտարերկրացիների հայտարարությունները՝ հայ-թուրքական սահմանն անօրինական կերպով հատելու վերաբերյալ, չեն հաստատվել։

«Հոկտեմբերի 28-ին Թունա Բեքլևիչը և Բայբարս Օրսեկն օրինական ճանապարհով, Բագրատաշենի (հայ-վրացական սահման. «Նովոստի-Արմենիա») անցակետով, ժամանել են Հայաստան և հաջորդ օրը, «Հայացք» մամուլի ակումբում տեղի ունեցած ասուլիսի ընթացքում, Բեքլևիչը վերահաստատել է, որ իրենք հոկտեմբերի 11-ին ոտքով հատել են հայ-թուրքական սահմանը»,- ասվում է հաղորդագրության մեջ։

Վերոնշված հայտարարությունների առնչությամբ պարզաբանումներ ստանալու համար Թուրքիայի քաղաքացիները հրավիրվել են ՀՀ Ազգային անվտանգության ծառայության վարչական շենք, ուր հայ-թուրքական սահմանը հատելու վերաբերյալ  որևէ  հիմնավոր փաստարկ չեն կարողացել ներկայացնել։

«Բեքլևիչը և Օրսեկը նախազգուշացվել են, որ նման վարքագիծը և անպատասխանատու հայտարարություններն անընդունելի են և նրանց առաջարկվել է լքել Հայաստանի տարածքը»,- ասվում է հաղորդագրության մեջ։ -0-