Ռուսաստանից Հայաստանի տնտեսություն կատարված ուղղակի ներդրումների հոսքը 2009թ.-ին կրճատվել է 46,1%-ով՝ հասնելով 384,8 միլիոն դոլարի

Ռուսաստանից Հայաստանի տնտեսության իրական հատված կատարված ուղղակի ներդրումների հոսքը 2009 թ.-ին, 2008 թ.-ի համեմատ, կրճատվել է 46,1 տոկոսով և կազմել 384,8 միլիոն դոլար: Այս մասին «Նովոստի-Արմենիա» գործակալությանը տեղեկացրեցին ՀՀ ազգային վիճակագրական ծառայությունից:

Ընդ որում Հայաստանի իրական հատված կատարված ռուսական ներդրումների ընդհանուր ծավալը կազմել է 502,9 միլիոն դոլար՝ կրճատվելով 42,9 տոկոսով:

Ըստ վիճակագրական տվյալների, Ռուսաստանի ներդրողներին բաժին է հասել Հայաստանի իրական հատված կատարված օտարերկրյա ներդրումների ընդհանուր ծավալի 53,57 տոկոսը և ուղղակի ներդրումների ծավալի 52,56 տոկոսը:

Ռուսաստանցի ներդրողներն իրենց միջոցների 37,1 տոկոսը (186,8 միլիոն դոլար) ուղղել են էլեկտրաէներգիայի, գազի, տաք ջրի և ջեռուցման արտադրության և բաշխման ոլորտ, 37 տոկոսը (185,8 միլիոն դոլար)՝ վերգետնյա տրանսպորտի ոլորտ և 21 տոկոսը (105,5 միլիոն դոլար)՝ կապի ոլորտ:

Հայաստան կատարված ներդրումների ծավալով 2009 թ.-ի արդյունքում Ռուսաստանը բացարձակ առաջատարն է:

Հայաստանի տնտեսություն կատարված օտարերկրյա ներդրումների ընդհանուր ծավալը 2009 թ.-ին կազմել է 935,5 միլիոն դոլար, որոնցից 732,1 միլիոն դոլարը իրական հատված կատարված ուղղակի ներդրումներն են:-0-