Մարտի 25-ին Հայաստանում մեկնարկում է կարճամետրաժ թուրքական ֆիլմերի «23,5» երկրորդ փառատոնը

ԵՐԵՎԱՆ, 17 մարտի. /Նովոստի-Արմենիա/. Մարտի 25-ին Հայաստանում մեկնարկում է կարճամետրաժ թուրքական ֆիլմերի «23,5» երկրորդ փառատոնը, երեքշաբթի հայտնեց Խաղաղապահ նախաձեռնությունների կովկասյան կենտրոնի նախագահ Գեորգի Վանյանը:  

«Մարտի 25-ին Հայաստանում մեկնարկում է «23,5» երկրորդ փառատոնը, որի ընթացքում կկայանա առաջին փառատոնի հաղթողին մրցանակի շնորհումը»,- ասաց Վանյանը՝ նշելով, որ միջոցառումը կլուսաբանեն յոթ լրագրողներ թուրքական առաջատար ԶԼՄ-ներից: :   

Ըստ նրա` փառատոնը բաղկացած կլինի 2 փուլից, մարտի 25-27-ին փառատոնը կանցկացվի Երևանում, իսկ մինչև տարեվերջ հայտավորված ֆիլմերը կներկայացվեն ՀՀ մարզերում:

«Մենք 77 հայտ ենք ստացել, որից մրցութային ծրագրին մասնակցելու համար ընտրել ենք 10-ը»,- ասաց նա՝ նշելով, որ ֆիլմերի ընդհանուր տևողությունը 1 ժամ 11 րոպե է:
 
Նրա խոսքով՝ փառատոնի միակ մրցանակը «Հեռուստադիտողի համակրանք» մրցանակն է:

Փառատոնին ողջույնի խոսքով հանդես կգան Հայաստանում մեծ Բրիտանիայի արտակարգ և լիազոր դեսպան Չարլզ Լոնսդեյլն ու «Հրանտ Դինք» միջազգային հիմնադրամի ներկայացուցիչ, թուրքական «Ագոս» շաբաթաթերթի լրագրող Արիս Նալչին:

Փառատոնը կազմակերպում է Խաղաղապահ նախաձեռնությունների կովկասյան կենտրոնը Մեծ Բրիտանիայի դեսպանատան աջակցությամբ Հայաստանի, Թուրքիայի և Ադրբեջանի միջև «Քայլ դեպի երկխոսություն» ծրագրի շրջանակներում: Փառատոնի բյուջեն 5,9 մլն դրամ է ($15 հազար): -0-