Արցախում ոստիկանության 4 ծառայողներ են ինքնամեկուսացվել կորոնավիրուսի պատճառով
ԵՐԵՎԱՆ, 10 ապրիլի./Նովոստի-Արմենիա/. Արցախի Հանրապետություն «Աղավնո» հսկիչ անցակետում ծառայություն իրականացնող ոստիկանության 4 ծառայողները ինքնամեկուսացվել են: Այս մասին նշվում է Արցախի տեղեկատվական շտաբի Facebook-յան էջում:
«Արցախի Հանրապետության ոստիկանությունից տեղեկացնում են, որ նոր տիպի կորոնավիրուսի վարակի տարածման կանխարգելիչ միջոցառումների շրջանակներում, հաստատված կորոնավիրուսի վարակով անձանց հետ հնարավոր շփում ունեցած Արցախի Հանրապետություն «Աղավնո» հսկիչ անցակետում ծառայություն իրականացնող ոստիկանության 4 ծառայողները, որոնք թեև ծառայություն են իրականացրել պաշտպանիչ դիմակներով և ձեռնոցներով, բայց, ապահովության նկատառումներից ելնելով, ինքնամեկուսացվել են»,- նշվում է հաղորդագրության մեջ:
Հաղորդվում է, որ ինքնամեկուսացված ոստիկանները ջերմություն, վարակին բնորոշ ախտանիշներ կամ որևէ բողոք չունեն:
Հիշեցնենք, որ Արցախում հաստատվել է կորոնավիրուսով վարակման 3 դեպք:-0-
