Գյումրիում սուր աղիքային վարակի դեպքեր են գրանցվել․ 15 երեխա հոսպիտալացվել է
ԵՐԵՎԱՆ, 15 մայիսի․/Նովոստի–Արմենիա/․ Շիրակի մարզի Գյումրի քաղաքում արձանագրվել են սուր աղիքային վարակի դեպքեր, հայտնում է Հիվանդությունների վերահսկման և կանխարգելման կենտրոնը։
Գյումրու «Տիրամայր Հայաստանի» կենտրոնի 15 սան հոսպիտալացվել է Գյումրու բժշկական կենտրոնի ինֆեկցիոն բաժանմունք:
«Բուժառուների վիճակը գնահատվում է բավարար, արձանագրվում է դրական դինամիկա, իսկ այսօրվա դրությամբ նոր դեպքեր չեն գրանցվել», – նշվում է հաղորդագրության մեջ։
Դեպքի առնչությամբ ՀՀ ԱՆ Հիվանդությունների վերահսկման և կանխարգելման ազգային կենտրոնի մասնագետներն իրականացրել են համաճարակաբանական ուսումնասիրություն, ինչպես նաև նմուշառումներ և լաբորատոր հետազոտություններ։
Կենտրոնից հայտնում են, որ խմելու ջրի հետազոտությունների արդյունքում շեղումներ չեն հայտնաբերվել։
«Կենսաբանական նմուշների հետազոտությունները շարունակվում են: Լրացուցիչ տեղեկատվություն կտրամադրվի հետազոտությունների ավարտից հետո», – նշվում է հաղորդագրության մեջ։
