Սոցիալական ցանցերում հայտնվել է Դոնի Ռոստովում Boeing–ի կործանման տեսանյութը
ԵՐԵՎԱՆ, 19 մարտի. /Նովոստի–Արմենիա/. Սոցիալական ցանցերում հայտնվել է տեսանյութ, որտեղ երևում է Դոնի Ռոստովի օդանավակայանում FlyDubai ավիաընկերությանը պատկանող Boeing–ի կործանման պահը։
Ավիավթարի հետևանքով զոհվել է 62 մարդ, հաղորդում է ՌԲԿ–ն։
Տեսանյութում, մասնավորապես, երևում է այն պահը, թե ինչպես է ինքնաթիռը հարվածում գետնին։
Ինքնաթիռում գտնվող անձնակազմի բոլոր անդամները և ուղևորները զոհվել են։ Հաղորդվում էր, որ զոհերի շրջանում կարող են լինել նաև չորս երեխաներ։ Ինքնաթիռը կատարում էր Դուբայ–Դոնի Ռոստով չվերթը։
ՌԴ ԱԻՆ–ը «թեժ գիծ» է գործարկել ավիավթարի կապակցությամ 8-800-775-17-17 հեռախոսահամարով։ Օդանավակայանում աշխատում են Հոգեբանական օգնության կենտրոնի հարավային մասնաճյուղի հոգեբանները։
Դոնի Ռոստովում կործանված օդանավի ուղևորների ցուցակը. հայեր, ենթադրաբար, չկան>>
ՌԴ քննչական կոմիտեից տեղեկացրել են, որ ինքնաթիռը կործանվել է գետնին բախվելու հետևանքով։ Գերատեսչությունը ստուգում է աղետի փաստերը։ Ավելի վաղ հաղորդվում էր, որ ինքնաթիռի վթարից հետո օդանավակայանի տարածքում հրդեհ է բռնկվել, որը մոտ մեկ ժամ հետո մարվել է ԱԻՆ աշխատակիցների կողմից։-0-
