Կոնգոյում Էբոլայի հաստատված դեպքերը գերազանցել են 4000-ը. ԶԼՄ

ԵՐԵՎԱՆ, 7 օգոստոսի․/Նովոստի-Արմենիա/. Կոնգոյի Դեմոկրատական Հանրապետությունում Էբոլայի հաստատված դեպքերն ընթացիկ բռնկման ժամանակ առաջին անգամ, ըստ կառավարության տվյալների, գերազանցել են 4,000-ը, հայտնում է Reuters-ը։

Համաճարակը, որն աշխարհում երկրորդ խոշորագույնն է, բնութագրվում է որպես պատմության մեջ ամենաարագ տարածվողը։
Փորձագետները կարծում են, որ վարակները սկսել են տարածվել բռնկման վերաբերյալ պաշտոնական հայտարարությունից՝ մայիսի 15-ից ամիսներ առաջ, և որ դեպքերի իրական թիվը կարող է շատ ավելի բարձր լինել, քան պաշտոնական տվյալներն են։

Կենտրոնական Աֆրիկայի երկրների հանրային առողջության ինստիտուտի վերջին զեկույցի համաձայն՝ վարակների ընդհանուր թիվը հասել է 4,053-ի, որոնցից 1,850-ը՝ մահվան ելքով։ Վարակի դեպքեր են գրանցվել հինգ նահանգներում՝ Իտուրի, Հյուսիսային Կիվու, Հարավային Կիվու, Վերին Ուելե և Չոպո:

Նախորդ ամիս Science ամսագրում հրապարակված զեկույցի համաձայն՝ բռնկումն սկսվել է հունվարին կամ նույնիսկ ավելի վաղ՝ Իտուրիում: Հետազոտողները հայտնաբերել են ավելի քան 500 կասկածելի դեպք հունվարի կեսերից մինչև մայիսի 15-ն ընկած ժամանակահատվածում։

Հիվանդության արագ տարածման և վերահսկման դժվարությունների պատճառ են դարձել ուշացած հայտնաբերումը, ռազմական հակամարտությունները, ինչպես նաև տվյալ վիրուսի տեսակի դեմ համապատասխան պատվաստանյութերի և բուժման միջոցների բացակայությունը։

Մինչ այժմ Էբոլայի միայն մեկ՝ 2014-2016 թվականների Արևմտյան Աֆրիկայի բռնկումն է ավելի մեծ մասշտաբներ ունեցել, որի ընթացքում Գվինեայում, Լիբերիայում և Սերրա Լեոնեում գրանցվել էր ավելի քան 28,000 դեպք։