Չինաստանն առաջին անգամ ցուցադրել է օդային միջուկային հարվածային համակարգը (ՎԻԴԵՈ)

ԵՐԵՎԱՆ, 5 օգոստոսի. /Նովոստի–Արմենիա/. Չինաստանի պետական լրատվամիջոցներն առաջին անգամ հրապարակել են կադրեր, որոնք, ըստ China Daily-ի, ցուցադրում են երկրի օդային միջուկային հարվածային բաղադրիչի հնարավորությունները։

Տեսանյութում երևում է Xian H-6N ռազմավարական ռմբակոծիչը, որը թռչում է երկու J-20 կործանիչների ուղեկցությամբ։ Ռմբակոծիչը կրում է JL-1 օդից արձակվող բալիստիկ հրթիռ, որը կարող է ունենալ միջուկային մարտագլխիկ։

Ինչպես նշում է China Daily-ն, տեսանյութը հրապարակվել է Չինաստանի Կենտրոնական ռազմական խորհրդի Քաղաքական աշխատանքի վարչության, Չինաստանի Կիբերտարածության վարչության և China Media Group-ի համատեղ նախագծի շրջանակում։ Պարբերականի գնահատմամբ՝ սա Չինաստանի միջուկային եռյակի օդային բաղադրիչի գործողության առաջին հրապարակային ցուցադրությունն է։

Միաժամանակ նշվում է, որ JL-1 հրթիռը և Չինաստանի միջուկային եռյակի օդային բաղադրիչը նախկինում արդեն ներկայացվել էին հրապարակայնորեն՝ 2025 թվականի սեպտեմբերի ռազմական շքերթի ընթացքում։ Ներկայիս հրապարակման առանձնահատկությունն այն է, որ առաջին անգամ ցուցադրվել են H-6N ռմբակոծիչի թռիչքի կադրեր՝ այդ հրթիռով։

br>