Նախորդ շաբաթվա կարևորագույն նորությունների հնգյակը
28.05.2016,
10:00
«Նովոստի-Արմենիա» գործակալությունը ներկայացնում է նախորդ աշխատանքային շաբաթվա կարևորագույն նորությունների հնգյակը։
ԵՐԵՎԱՆ, 28 մայիսի. /Նովոստի-Արմենիա/. «Նովոստի-Արմենիա» գործակալությունը ներկայացնում է նախորդ աշխատանքային շաբաթվա կարևորագույն նորությունների հնգյակը։
- Երկուշաբթի՝ մայիսի 23-ին, ուժեղ քամի է մոլեգնել մայրաքաղաքում և հանրապետության մի շարք համայնքներում: Ժամը 17.00-ից մինչև 18.00-ը Հանրապետության տարածքում քամու ուժգնությունը կազմել է 18-22 մ/վրկ: Ուժեղ քամին, որն ուղեկցվել է տեղատարափ անձրևով, մեծ վնասներ է հասցրել Երևանում և հանրապետության մի շարք մարզերում։ Պոկվել են բազմաթիվ տների տանիքներ, ծառեր են արմատախիլ եղել` ստեղծելով խցանումներ ճանապարհներին։ Ուժեղ քամու հետևանքով վնասվել են նաև էլեկտրահաղորդալարեր և գազատար խողովակներ, առանձին շրջաններում վնասվել են նաև ցանքատարածքներ և պտղատու այգիներ։
- Հայաստանի հավաքականի կիսապաշտպան Հենրիխ Մխիթարյանը ճանաչվել է Գերմանիայի գավաթի լավագույն ռմբարկու, ինչպես նաև՝ Գերմանիայի առաջնության լավագույն ֆուտբոլիստ Բունդեսլիգայի ֆուտբոլիստների միջև գերմանական Kicker հեղինակավոր պարբերականի անցկացված հարցման արդյունքներով։
- Երևանի Բաշինջաղյան փողոցի թիվ 180 շենքի մոտ քաղաքացի էր այրվել։ Ավելի ուշ հայտնի դարձավ, որ նա հիվանդանոցում մահացել է։
- ՀՀ տրանսպորտի և կապի նախարար Գագիկ Բեգլարյանի երկու թիկնապահներին մեղադրանք է առաջադրվել հինգ անձանց դաժանաբար ծեծի ենթարկելու համար։ Ըստ ՀՀ ՔԿ մամուլի ծառայության հաղորդման, նախնական տվյալներով՝ 2016 թվականի մայիսի 16-ին՝ ժամը 16:30-ի սահմաններում, ՀՀ տրանսպորտի և կապի նախարարության բակային հատվածում տեղի է ունեցել վիճաբանություն, որի ընթացքում բռնություն է գործադրվել 5 անձի նկատմամբ՝ պատճառելով տարբեր աստիճանի մարմնական վնասվածքներ։
- ՀՀ քննչական կոմիտեի զինվորական քննական գլխավոր վարչության իններորդ կայազորային քննչական բաժնում հարուցվել է քրեական գործ՝ ժամկետային զինծառայող, սերժանտ Հակոբ Գևորգյանի սպանության դեպքի առթիվ։ -0-
Պատճենել հղումը
