Բաշինջաղյան փողոցում ինքնահրկիզված տղամարդը մահացել է

ԵՐԵՎԱՆ, 27 մայիսի. /Նովոստի–Արմենիա/. Նախօրեին Երևանում մահացել է 70–ամյա Համլետ Մելիքյանը , ով նույն օրը գիշերն այրվածքներ էր ստացել, «Նովոստի–Արմենիա» գործակալությանը հայտնեց Ճառագայթային բժշկության և այրվածքների հանրապետական գիտական կենտրոնի տնօրեն Նորայր Դավիդյանը։

ԱԻՆ–ի տվյալներով` նախօրեին ժամը 00։43–ին ահազանգ է ստացվել, որ Երևանի Բաշինջաղյան փողոցի թիվ 180 շենքի մոտ քաղաքացի է այրվում։ Մինչ հրշեջ-փրկարարների կանչի վայր հասնելը՝ հրդեհը մարվել է տեղի ուժերով. քաղաքացին տարբեր աստիճանի այրվածքներով հոսպիտալացվել է Ճառագայթային բժշկության և այրվածքների հանրապետական գիտական կենտրոն։

Երևանում գիշերն այրված տղամարդու վնասվածքները կյանքի հետ անհամատեղելի են>>

«Վնասվել էր մարմնի մակերևույթի 95 տոկոսը։ Այրվել էին նաև շնչուղիները։ Երբ նրան տեղափոխեցին հիվանդանոց, անհնար էր որոշել նրա անձն ու տարիքը։ Կեսօրից հետո նրա մոտ եկան երեխաները», – ասաց Դավիդյանը։

Նրա խոսքով` մահացած տղամարդու երեխաներն ասացին, որ նա միշտ այդ ժամին դուրս էր գալիս զբոսնելու։

Միաժամանակ ոստիկանության մամուլի ծառայությունից «Նովոստի–Արմենիա» գործակալությանը հայտնեցին, որ, նախնական տվյալներով, տղամարդն ինքնահրկիզվել է։ –0–