ԵՐԵՎԱՆ, 25 մայիսի. /Նովոստի–Արմենիա/. ՀՀ տրանսպորտի և կապի նախարարության դալանում տեղի ունեցած ծեծկռտուքի պատմությունը սկսվել է մի առաքիչից, որն իր աշխատանքի բերումով գնացել է «Երևան մոլ»-ում գտնվող «Կարֆուր» սուպերմարկետ, գրում է
«Ժողովուրդը»։
«Այստեղ իր ծառայությունն իրականացնող անվտանգության աշխատակիցը առաքիչից պահանջել է տրամադրել քարտը, որպեսզի հնարավորություն ունենա ներս մտնելու և ինչ որ բան առաքելու համար: Սակայն առաքիչը ասել է, որ իր առաքման քարտը մնացել է մեքենայի մեջ, որի փոխարեն առաջարկել է անվտանգության աշխատակցին տալ իր դրամապանակը, որտեղ եղել է անձը հաստատող փաստաթուղթ: Անվտանգության աշխատակիցը գրանցել է առաքիչի տվյալները և նրան ներս թողել: Օրեր հետո առաքիչը նկատել է, որ իր քարտային հաշվեհամարից մոտ 16 հազար դրամ գումար է պակասում: Հիշել է, թե երբ, ինչ հանգամանքներում է նա իր դրամապանակը (որտեղ եղել է բանկային քարտի կոդը) տվել «Կարֆուր»-ի աշխատակցին, ուստի որոշել է պարզել հանգամանքները: Զանգահարել է անվտանգության աշխատակցին, պայմանավորվել, հանդիպել Հանրապետության հրապարակի ժամացույցի մոտ», – գրում է թերթը։
Թերթի հաղորդմամբ` առաքիչն իր ընկերների և այլ երիտասարդների հետ գնացել է «Կարֆուրի» անվտանգության աշխատակցի հետ հանդիպման, որն էլ պայմանավորված վայր է հասել իր եղբոր և ընկերների ուղեկցությամբ։
Գագիկ Բեգլարյանի թիկնապահներին մեղադրանք է առաջադրվել մի խումբ անձանց ծանր մարմնական վնաս պատճառելու համար>>
ArmLur.am-ի տեղեկություններով` կողմերը զրուցելով հասել են ՀՀ Կապի և տրանսպորտի նախարարության ավտոտնակ, որտեղ առաքիչն, ըստ էության, «Կարֆուրի» անվտանգության աշխատակցին ասել է, թե նա է իր հաշվեհամարից գումարներ քաշում, իսկ անվտանգության աշխատակիցը հրաժարավել է այդ ամենից, և տղաների միջև ծագած անհասկացվածությունը վերածվել է ծեծկռտուքի։
«Իսկ ի՞նչ կապ ունի այստեղ ՀՀ տրանսպորտի և կապի նախարարությունը։ «Ժողովուրդը» պարզել է, որ առաքիչի հետ հանդիպման գնացած տղաներից Ա. Կարախանյանի եղբայրը տրանսպորտի նախարարության աշխատակիցներից մեկի մորաքրոջ տղան է։ Եվ երբ տղաները գնացել են հանդիպման ու չեն հասկացել միմյանց, քայլելով հասել են ՀՀ կապի և տրանսպորտի նախարարության դալան, ավտոտնակ, որտեղ էլ սկսվել է լեզվակռիվ, ծեծկռտուք, ինչին էլ միջամտել են նախարարության մի քանի աշխատակիցներ», – գրում են հոդվածի հեղինակները։
Թերթի հաղորդմամբ` ՀՀ Քննչական կոմիտեին մոտ կանգնած ArmLur.am-ի աղբյուրները հայտնել էին, որ մայիսի 16-ի այս գործով կալանավորվել է 5 հոգի։ Ու քանի որ Գագիկ Բեգլարյանն ուղղակի որևէ առնչություն չունի կատարվածում, ուստի իրավապահները քրեական գործ են հարուցել ՀՀ Քրեական օրենսգրքի 112 հոդվածի 2-րդ մասով՝ դիտավորությամբ մարդու առողջությանը ծանր վնասվածք հասցնելը (անձի կամ նրա մերձավորի նկատմամբ` կապված այդ անձի կողմից իր ծառայողական գործունեության կամ հասարակական պարտքի կատարման հետ): ՀՀ Քրեական օրենսգրքի այս հոդվածով նախատեսվում է 3-7 տարվա ազատազրկում: –0–
