Նախորդ շաբաթվա կարևոր նորությունների հնգյակը (հունվարի 27–ից փետրվարի 1–ը)

ԵՐԵՎԱՆ, 2 փետրվարի./Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը (հունվարի 27–ից փետրվարի 1–ը)։

• Չինաստանում տարածված նոր կորոնավիրուսը մտահոգություն է առաջացրել նաև հայաստանցիների շրջանում։ Այս թեմային են անդրադարձել ՀՀ առողջապահության փոխնախարար Լենա Նանուշյանն ու ՀՀ ԱՆ Հիվանդությունների վերահսկման և կանխարգելման ազգային կենտրոնի Հատուկ վտանգավոր և օդակաթիլային վարակների բաժնի պետ Լիանա Թորոսյան, ով խոսել է նաև Չինաստանից ստացվող ծանրոցների վարակիչ լինելու մասին։ Հայաստանում կորոնավիրուսի հետ կապված իրավիճակի մասին է խոսել ՀՀ առողջապահության նախարար Արսեն Թորոսյանը` նշելով, որ Հայաստանը պայմանավորվածություն է ձեռք բերել գնել կորոնավիրուսի ախտորոշման համար թեստեր։ Կորոնավիրուսի տարածման վտանգի կապակցությամբ Հայաստանի որոշել է ժամանավորապես կասեցնել Չինաստանի քաղաքացիների ազատ մուտքը Հայաստան։

• Հունվարի 28-30-ը Ժնևում ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա), Էնդրյու Շոֆերն (ԱՄՆ) առանձին և համատեղ ձևաչափով հանդիպումներ են անցկացրել Հայաստանի ԱԳ նախարար Զոհրաբ Մնացականյանի և Ադրբեջանի ԱԳ նախարար Էլմար Մամեդյարովի հետ: Հանդիպումներին մասնակցել է նաև ԵԱՀԿ գործող նախագահի անձնական ներկայացուցիչ Անջեյ Կասպրչիկը: Եռօրյա ինտենսիվ քննարկումների ընթացքում ԵԱՀԿ Մինսկի խմբի համանախագահները և ԱԳ նախարարները քննարկել են օրակարգային հարցեր։ Ժնևում հանդիպել են նաև Հայաստանի և Ադրբեջանի ԱԳ նախարարները։

• ՀՀ ոստիկանապետի ժամանակավոր պաշտոնակատար Արման Սարգսյանը մեկնաբանել է օրեր առաջ ընդդիմադիր մի շարք գործիչների բերման ենթարկելը։ Հիշեցնենք, որ օրեր առաջ հայտնի բլոգեր, «ՎԵՏՕ» քաղաքացիական նախաձեռնության հիմնադիր և հակասորոսական ակտիվիստ Նարեկ Մալյանին և «Ադեկվադ» ընդդիմադիր կուսակցության ղեկավար Կոնստանտին Տեր-Նակալյանին բերման էին ենթարկել ոստիկանություն՝ պաշտոնական տվյալներով ապօրինի զենք պահելու կամ կրելու կասկածանքով։ Ինչից հետո բերման էին ենթարկվել «Ադեկվադ» ընդդիմադիր շարժման համահիմնադիր Արթուր Դանիելյանը և «Քաղաքացիական գիտակցություն» ՀԿ նախագահ Նարեկ Սամսոնյանը։ Բոլորն ազատ են արձակվել նույն օրը։

• ՀՀ վարչապետ Նիկոլ Փաշինյանի առաջարկով և ՀՀ նախագահ Արմեն Սարգսյանի հրամանագրով, Հայկ Մհրյանը նշանակվել է ՀՀ ոստիկանության պետի տեղակալ։

•  Ալմաթիում կայացել է Եվրասիական միջկառավարական խորհրդի նիստը, որին մասնակցել է ՀՀ նախագահ Նիկոլ Փաշինյանը։–0–