Հայաստանում կորոնավիրուսով հիվանդներ չկան. ԱՆ–ն ներկայացրել է խորհուրդներ` ինչպես չվարակվել կորոնավիրուսով (ՎԻԴԵՈ)

ԵՐԵՎԱՆ, 29 հունվարի. /Նովոստի-Արմենիա/. Այս պահին կորոնավիրուսով հիվանդներ Հայաստանում չկան, իրավիճակը լիովին վերահսկելի է, չորեքշաբթի լրագրողներին ասաց ՀՀ առողջապահության փոխնախարար Լենա Նանուշյանը:

ԱՀԿ-ի տվյալներով՝ նոր կորոնավիրուսով վարակված է 4,593 մարդ (նրանցից 4537-ը՝ Չինաստանում): Չինաստանի առողջապահության ազգային հանձնաժողովը հայտնել է 5974 հաստատված դեպքերի մասին, հաշվի առնելով բոլոր երկրների վարակվածներին՝  6053: Ազգային հանձնաժողովի տվյալներով ՝ գրեթե 60 հազար մարդ հետազոտվում է, բուժվել է 103-ը: Եվս 132 մարդ մահացել է:

Սնունդը և զբոսաշրջիկները վերահսկվում են

Ինչպես նշեց փոխնախարարը, հաշվի առնելով ԱՀԿ-ի խորհուրդը, Հայաստանը, Սննդամթերքի անվտանգության տեսչական մարմնի որոշմամբ, արգելել է Չինաստանից կենդանական մթերքների և հումքի, ինչպես նաև այլ երկրներում չինական հումքից պատրաստված արտադրանքի ներկրումը:

Բացի այդ, նա ասաց, որ Արտաքին գործերի նախարարության և Տուրիզմի կոմիտեի հետ համագործակցության արդյունքում տուրիստական ​​գործակալությունների համար կազմվել է հուշաթերթիկ` տուրիստական խմբերում վիրուսի նախանշանների հայտնաբերման դեպքում տեղեկացնելու անհրաժեշտության մասին:

ԱԳՆ-ն նաև կոչ է արել ՀՀ քաղաքացիներին ձեռնպահ մնալ Չինաստան այցերից, իսկ այլ երկրներ այցելելիս ՝ հետևել վիրուսի տարածման հետ կապված իրավիճակին:

Ինչ վերաբերում է զբոսաշրջիկներին, այդ թվում` նաև Չինաստանից Հայաստան եկած հայերին, ապա, փոխնախարարի խոսքով, անցակետերում նրանք ջերմաստիճանի չափումներ են կատարում և լրացնում հատուկ քարտ` անձնական տվյալներով և բնակության հասցեով:

 «Այդ քարտերը փոխանցվում են կլինիկաներ ՝ հսկողության համար, և եթե վիրուսը հայտնաբերվի, վարակի տարածքը հնարավոր է անմիջապես որոշել», - ասաց Նանուշյանը ՝ հավելելով, որ ինկուբացիոն շրջանը տևում է մեկից մինչև 14 օր, և մինչ այժմ Չինաստանի սահմաններից դուրս վիրուսի մարդուց մարդ փոխանցման որևէ դեպք չի գրանցվել։

Բացի այդ, Առողջապահության նախարարությունը կապի մեջ է ԱՊՀ և ԵՏՄ գործընկերների հետ, ինչպես նաև ձեռնարկում է սանիտարահիգիենիկ հսկողության բոլոր անհրաժեշտ միջոցները:

Հայերը Ուհանում

Ինչպես նշել է Նանուշյանը, Ուհան քաղաքում գտնվող ՀՀ քաղաքացիները նախազգուշացվել են և մշտական ​​կապի մեջ են դեսպանության հետ: Ցանկության դեպքում նրանք կվերադարձվեն հայրենիք: Խոսքը երեք ուսանողի և 2-3 պայմանագրային աշխատողների մասին:

ՀՀ ԱՆ Հիվանդությունների վերահսկման և կանխարգելման ազգային կենտրոնի Հատուկ վտանգավոր և օդակաթիլային վարակների բաժնի պետ Լիանա Թորոսյանն իր հերթին նշեց, որ Ուհան քաղաքում ՀՀ քաղաքացիները որևէ խնդիր չունեն:

«Նրանք աշխատում են դուրս չգալ տանից, սահմանափակել գործողությունները, հետևում են իրենց սննդակարգին և ինքնազգացողության հետ կապված բողոքներ չունեն», - ասաց Թորոսյանը:

Ինչպես հայտնաբերել վիրուսը և ինչ անել

Ինչպես նշեց Թորոսյանը, նոր կորոնավիրուսի ախտանիշները նման են սովորական գրիպի ախտանիշներին` բարձր ջերմություն, վատ ինքնազգացողություն, ինչը հիմնականում դրսևորվում է թոքաբորբի տեսքով։

«Ախտորոշումից հետո, եթե նոր կորոնավիրուսի կասկած կառաջանա, հիվանդի անալիզները կուղարկվեն միջազգային լաբորատորիաներից մեկը` Անգլիա, Գերմանիա, Նիդերլանդներ, Ռուսաստան, քանի որ Հայաստանում դեռ չկան հստակ ախտորոշման համար անհրաժեշտ թեստեր (ռեագենտներ)», – ասաց Թորոսյանն` ընդգծելով, որ դիվանագիտական մակարդակում ընթանում են բանակցություններ` առնվազն կարճ ժամկետներում թեստերը Հայաստան բերելու համար։

Նրա խոսքով, թեստերի բացակայությունը պայմանավորված է նաև նրանով, որ Հայաստանը չի համարվում վարակի բարձր ռիսկ ունեցող երկիր, քանի որ Չինաստանի հետ չունի ընդհանուր սահմաններ և ուղիղ ավիաչվերթեր։

Ամեն դեպքում Առողջապահության նախարարությունը խորհուրդ է տալիս առաջիկա մի քանի ամսում սահմանափակել այցերը Չինաստան, հետևել ձեռքերի հիգիենային և հասարակական վայրերում օգտագործել պաշտպանիչ միջոցներ, օրինակ` դիմակներ։

Նրա խոսքով, նախնական հետազոտությունները ցույց են տվել, որ վիրուսը զգայուն է քլորի և սպիրտի նկատմամբ, ինչի կապակցությամբ խորհուրդ է տրվում պարրբերաբար մաքրել մակերեսները քլորով և սպիրտով։

Խորհուրդ չի տրվում օգտագործել ծովամթերք, վայրի կենդանիների միս, հում մթերք, պետք է խմել միայն շշլացված ջուր։

ԱՆ–ն հորդորում է քաղաքացիներին հիվանդության առաջին ախտանշանների դեպքում չզբաղվել ինքնաբուժմամբ, այլ դիմել մասնագետներին և պարտադիր նշել, թե որտեղ են գտնվել վերջին 14 օրվա ընթացքում։

Վիրուսի նկատմամբ առավել խոցելի են 65 տարեկանից բարձր անձինք, երեխաները, ինչպես նաև այլ հիվանդություններ ունեցող մարդիկ, ընդ որում վերջիններիս մոտ մահացու ելքի ռիսկն ավելի բարձր է։

Չինական վիրուս

2019-nCoV կորոնավիրուսի հիվանդացության առաջին դեպքերը գրանցվել են Չինաստանում նախորդ տարվա դեկտեմբերին։ Վարակի դեպքեր են գրանցվել Ֆրանսիայում, Գերմանիայում, ԱՄՆ–ում, Ճապոնիայում, Կորեայում, Թաիլանդում, Ավստրալիայում։ Չինաստանից դուրս գրանցված բոլոր դեպքերն արձանագրվել են զբոսաշրջիկների մոտ, ովքեր եղել են Չինաստանի Հուբեյ նահանգում և նրա վարչական շրջանում` Ուհան քաղաքում, որտեղ Չինաստանի իշխանություններն արդեն հայտարարել են կարանտին և փակել քաղաքը։

ԱՀԿ–ի տվյալներով, աշխարհում չկա արտակարգ իրավիճակ վիրուսի տարածման կապակցությամբ, նման իրավիճակ է դեռ միայն Չինաստանում։ ԱՀԿ–ի ուսումնասիրության համաձայն, վիրուսի տարածման հիմնական աղբյուրն Ուհանի ծովամթերքի շուկան է, և բացառված չէ, որ վիրուսը փոխանցվել է մարդուն ծովամթերքից կամ վայրի կենդանուց։–0–