«Բորուսիան» չի ցանկանում նվազեցնել Հենրիխ Մխիթարյանի տրանսֆերային գինը

ԵՐԵՎԱՆ, 21 հունիսի. /Նովոստի-Արմենիա/. Դորտմունդի «Բորուսիա» ֆուտբոլային ակումբը չի ցանկանում նվազեցնել իր կիսապաշտպան, Հայաստանի ազգային հավաքականի ավագ Հենրիխ Մխիթարյանի տրանսֆերային արժեքը, հայտնում է իտալական gianlucadimarzio պարբերականը:

Պարբերականի տվյալներով, բանակցությունները Դորտմունդի ակումբի և «Մանչեսփեր Յունայթեդի» միջև դեռ շարունակվում են: ««Յունայթեդն» առաջարկել է Մխիթարյանի համար 25 մլն եվրո, սակայն Բորուսիան շարունակում է 40 մլն պահանջել», - նշվում է հրապարակման մեջ: Այդպիսով, «Արսենալը» դեռ պահպանում է Մխիթարյանին իր թիմ տեղափոխելու հնարավորությունը:

Ավելի վաղ հայտնի էր դարձել, որ 27–ամյա Մխիթարյանը հրաժարվել է երկարացնել պայմանագիրը «Բորուսիայի» հետ և մտադիր է փոխել ակումբը։ Անգլիական ԶԼՄ–ները նշում են, որ «Մանչեսթեր Յունայթեդից» բացի, Մխիթարյանի ծառայություններով հետաքրքրվում են «Արսենալը», «Չելսին» և «Յուվենտուսը»։

Նախորդ սեզոնի ընթացքում Մխիթարյանն ակումբային մակարդակում մասնակցել է 52 հանդիպման` դառնալով 23 գոլի և 32 գոլային փոխանցման հեղինակ։ Transfermarkt.de պորտալը Մխիթարյանին գնահատում է 30 մլն եվրո։ –0–