ԵՐԵՎԱՆ, 4 հուլիսի./Նովոստի-Արմենիա/. Լրագրողական ՀԿ-ները կառավարությունից պահանջում են վերանայել ԶԼՄ-ների գործունեության սահմանափակումը կորոնավիրուսի համավարակի պայմաններում:
Загружается новость ... "Лево"
Հիշեցնենք, որ նախօրեին՝ հուլիսի 3-ին ոստիկաններն այցելել են «Արմնյուզ» և «5-րդ ալիք» հեռուստաընկերություններ՝ նպատակ ունենալով վարչական վարույթ հարուցել հեռուստաեթերում դիմակ չկրելու համար։
Խոսքի ազատության պաշտպանության կոմիտեի կողմից տարածած լրագրողական ՀԿ-ների հայտարարության մեջ նշվում է, որ այն ստորագրած կազմակերպությունները, նույնիսկ հաշվի առնելով կորոնավիրուսի համավարակի հետ կապված արտակարգ դրության պահանջները՝ տեղի ունեցածը դիտարկում են իրավապահ մարմնի կողմից լիազորությունների չարաշահում։
«Հասարակության մեջ առկա քաղաքական և հոգեբանական լարվածության պայմաններում իշխանությունները պետք է առավել նրբանկատություն ցուցաբերեն և խուսափեն անհարկի խիստ քայլեր ձեռնարկելուց։ Համոզված ենք, որ եթերում դիմակ կրելու կամ չկրելու հարցը հնարավոր է լուծել այլ ճանապարհով՝ քննարկումների, պարզաբանումների և փոխհամաձայնությունների միջոցով»,- նշվում է հայտարարության մեջ:
Կազմակերպությունները պահանջում են կառավարությունից և պարետատնից ուժային կառույցները չօգտագործել իրենց ոչ բնորոշ գործողություններում և բացառել նրանց միջամտությունը լրատվամիջոցների գործունեությանը: Նույնպես նրանք պահանջում են, հաշվի առնելով լրատվական, հատկապես հեռուստատեսային գործունեության առանձնահատկությունները՝ վերանայել և հստակեցնել համաճարակի հետ կապված՝ ԶԼՄ-ներին վերաբերող աշխատանքային պայմանների սահմանափակումները։
«Մենք նաև հորդորում ենք լրատվամիջոցներին՝ զերծ մնալ Պարետատան որոշումների հնարավոր խախտումներից՝ գիտակցելով սեփական պատասխանատվությունը համաքաղաքացիների, այդ թվում իրենց իսկ աշխատակիցների առողջության համար»,- ընդգծել են կազմակերպությունից:
Հայտարարությունը ստորագրել են Մեդիա նախաձեռնությունների կենտրոն, Խոսքի ազատության պաշտպանության կոմիտեն, Երևանի մամուլի ակումբը, լրագրողների «Ասպարեզ» ակումբը, Ինֆորմացիայի ազատության կենտրոնը, Բազմակողմանի տեղեկատվության ինստիտուտը Հայաստանում, Հանրային լրագրության ակումբ, «Լրագրողներ հանուն ապագայի» ՀԿ, «Լրագրողներ հանուն մարդու իրավունքների» ՀԿ, Գորիսի մամուլի ակումբը:
Մայիսի 25-ից սկսած Հայաստանում կորոնավիրուսի տարածումը կանխելու նպատակով սահմանված է պարտադիր դիմակային ռեժիմ: Դիմակ չկրելու համար տուգանքը կազմում է 10 հազ. դրամ: -0-
