Չեմ հիշում, որ պինցետով հանելու և արաղով ախտահանելու վերաբերյալ հայտարարություն եմ արել. Փաշինյան (ՎԻԴԵՈ)

ԵՐԵՎԱՆ, 16 մայիսի․ /Նովոստի-Արմենիա/․ Մայիսի 16–ին, առցանց մամուլի ասուլիսի ժամանակ ՀՀ վարչապետ Նիկոլ Փաշինյանին լրագրողը հարց է ուղղել․ «Թագավարակի տարածման համար մեղադրում էք քաղաքացիներին, այն դեպքում, երբ Դուք կորոնավիրուսի տարածման նախնական շրջանում հայտարարում էիք՝ «կորոնովիրուսն ո՞ւմ շունն է, պինցետով կհաննենք ու տնական արաղով կախտահանենք». պարոն վարաչպետ ինչու է ժողովուրդը միշտ մեղավոր»։

Վարչապետը պատասխանեց, որ ինքը չի հիշում, որ պինցետով հանելու և արաղով ախտահանելու վերաբերյալ հայտարարություն է արել, գուցե այլ շրջանակում է հնչել այդ հայտարարությունը։

«Կորոնովիրուսն ում շունն է, էլի որ ո՞ւմ շունն է, բայց շները նաև կծելու հատկություն ունեն և մենք ասում ենք եկեք այնպես անենք, որ այդ պարանը ձեռքներս պահենք կամ այնպես անենք, որ մեզ չկծի։ Ես քաղաքացիներին չեմ մեղադրել, բայց ուզում եմ ասել, որ քաղաքացիների հետ համագործակցությունը մեր քաղաքական գաղափարախոսության և ուսմունքի անբաժանելի մասն է։ Ես քաղաքական գործունեություն և երկրի կառավարում չեմ պատկերացնում առանց քաղաքացու հետ համագործակցության»,– ասաց վարչապետը։


Հիշեցնենք, որ մարտի 12-ին ՀՀ վարչապետ Նիկոլ Փաշինյանը սահմանադրական փոփոխությունների հանրաքվեի քարոզարշավի ժամանակ խոսել էր նախարարությունում աշխատող կոռումպացված աշխատակիցների մասին՝ ասելով, որ իրենք «համակարգային կոռուպցիան արմատախիլ են արել, բայց, ցավոք սրտի, այսօր էլ պետական համակարգում բազմաթիվ կաշառակերներ կան»։

«Վարչապետին ենթակա մարմնի աշխատողը քաղաքացուն ասում է «Գնա Կանադա, Նիկոլը խաբել է ձեզ, եկել ես էստեղ ինչ անես»։ Կորոնավիրուսը չի վտանգավոր։ Իսկակն կորոնավիրուսը դրանք են, որ մինչև հիմա մեր պետական համակարգի օրգանիզմը քայքայում են։ Ու այդ «կորոնավիրուսներին» հատիկ-հատիկ հանելու ենք, տնական արաղով դեզինֆեկցիա անենք, ուղարկենք իրենց գործերին»,- ասել է Վարչապետը։-0-