«Մենք պետք է սովորենք զուգահեռ ապրել կորոնավիրուսի հետ»․ Փաշինյան (ՎԻԴԵՈ)

ԵՐԵՎԱՆ, 3 մայիսի․ /Նովոստի-Արմենիա/․ ՀՀ վարչապետ Նիկոլ Փաշինյանը հայտարարել է, որ Հայաստանի բնակչությունը պետք է սովորի ապրել երկրում կորոնավիրուսի դեպքերի առկայության պայմաններում:

Նա ասաց, որ երկրում հայտարարվում է կորոնավիրուսի դեմ պայքարի նոր փուլ, որի իմաստն անցումն է  ապակենտրոնացված փուլին:

«Ակնհայտ է, որ մինչև հաջորդ տարվա մարտ-ապրիլ ամիսները կորոնավիրուսի նոր դեպքեր կգրանցվեն մինչև չստեղծվի պատվաստանյութ, այնպես որ վաղվանից պետք է արվի ամեն ինչ, որպեսզի ապահովվի համակեցության նոր կանոնների ապահովման հնարավորությունը, որպեսզի կարողանանք ապրել կորոնավիրուսին զուգահեռ, քանի որ հնարավոր չէ մի ամբողջ տարի ապրել սահմանափակումների պայմաններում», - ասաց վարչապետը՝ փոխվարչապետ, արտակարգ դրության պարետ Տիգրան Ավինյանի և առողջապահության նախարար Արսեն Թորոսյանի մասնակցությամբ ուղիղ եթերի ժամանակ:

Միաժամանակ, Փաշինյանը նշեց, որ եթե այսօր մենք վստահորեն իմանայինք, որ խստագույն սահմանափակումներով ևս մեկ ամսից հետո հնարավոր կլինի վերջ դնել համաճարակին, մենք կարող էինք այդ քայլին գնալ, բայց մենք փաստորեն արձանագրել ենք, որ սա անիրատեսական է և անհնար, «և վերջին երկու ամիսների վիճակագրությունը դա ցույց տվեց»:

Հայաստանում մարտի 16–ին մեկ ամսով հայտարարվել էր արտակարգ դրության ռեժիմ կորոնավիրուսի տարածումը կանխելու նպատակով։ Մարտի 24–ից ապրիլի 12–ը գործում էին մարդկանց տեղաշարժի և տնտեսական գործունեության սահմանափակումներ։ Ապրիլի 13–ին կառավարությունը որոշեց մեկ ամսով երկարացնել արտակարգ դրության ռեժիմը` մինչև 2020թ.–ի մայիսի 14–ը ժամը 17։00–ն։

Կիրակի`մայիսի 3–ի դրությամբ Հայաստանում գրանցվել է կորոնավիրուսի 2386 դեպք, 1035 մարդ առողջացել է, 35 մարդ, ցավոք, մահացել է։–0–