Հայաստանում կորոնավիրուսով վարակումների կրկնապատկման տեմպը պահպանվում է․ Թորոսյան (ՖՈՏՈ)

ԵՐԵՎԱՆ, 5 ապրիլի․ /Նովոստի-Արմենիա/․ ՀՀ առողջապահության նախարար Արսեն Թորոսյանը Facebook-յան իր էջում հրապարակել է կորոնավիրուսով վարակման դեպքերի կրկնապատկման գրաֆիկական կորը։

«7-օրյա կրկնապատկման տեմպը պահպանվում է»,- գրել է Թորոսյանը ֆրաֆիկի նկարագրությունում։

Ավելի վաղ նա ցույց էր տվել, թե ինչ տեմպերով են աճում ՀՀ-ում կորոնավիրուսով վարակման դեպքերը և թե ինչպես կշարունակեն աճել թվերը, եթե բնակչությունը չհետևի ինքնամեկուսացման ցուցումներին։ Թորոսյանը նշել է, որ նման տեմպերի դեպքում՝ ապրիլի 7-ին կունենանք մոտ 1000 դեպք, ապրիլի 14-ին 2000 և այդպես շարունակ: Եվ մեր բոլորիս խնդիրն է այնպես անել, որ այդ տեմպը գնալով դանդաղի, որպեսզի մենք ունենանք սկզբի համար ուղիղ այնքան նոր դեպք, որքան կունենանք առողջացած պացիենտ, իսկ հետո ավելի քիչ նոր դեպք, քան առողջացած պացիենտ:

Մարտի 16-ից ապրիլի 14-ը Հայաստանում, կորոնավիրուսի տարածումը կանխելու նպատակով, գործում է արտակարգ դրություն: Արտակարգ դրության պայմաններում Հայաստանում ազատ տեղաշարժի և տնտեսական գործունեության որոշ տեսակների սահմանափակումները (նախկինում գործում էր մարտի 24-ից մարտի 31-ը) երկարաձգվել են մինչև ապրիլի 12-ը ներառյալ: 

Հայաստանում կորոնավիրուսով վարակված մարդկանց ընդհանուր քանակը` 822 է, բուժվածներինը` 57, փաստացի բուժվողներինը` 758, բացասական թեստերը` 3844, 7 մարդ, ցավոք, մահացել է։-0-