Հայաստանում բժշկական դիմակների պակաս չկա, խոշոր առևտրի կենտրոններում դրանց կրելը պարտադիր կլինի. Ավինյան (ՎԻԴԵՈ)

ԵՐԵՎԱՆ, 3 մայիսի․ /Նովոստի-Արմենիա/․ Հայաստանում սկսվում է բժշկական դիմակների լայնածավալ արտադրության գործընթացը, հայտարարել է ՀՀ վարչապետ Նիկոլ Փաշինյանը:

«Հույս ունենք, որ օրական կարտադրվի մինչև 2000 դիմակ, և մենք դրանց հետ կապված խնդիրներ չենք ունենա», - ասաց նա փոխվարչապետ, արտակարգ դրության պարետ Տիգրան Ավինյանի և Առողջապահության նախարար Արսեն Թորոսյանի մասնակցությամբ ուղիղ եթերի ժամանակ։

Այս կապակցությամբ Ավինյանը հավելեց, որ, Տավուշի մարզպետի խոսքով, գործընթացն այսօր արդեն պետք է սկսված լինի: 

Բացի տեղական արտադրությունից, ինչպես նշել է պարետը, նաև ներկրվել է դիմակների մեծ խմբաքանակ:
«Ներկայումս մենք դիմակների պակաս չունենք, և միակ խնդիրը գների որոշակի տատանումն է», - ասաց նա ՝ հավելելով, որ ապագայում, երբ խոշոր առևտրի կենտրոնները և շուկաները վերսկսեն իրենց գործունեությունը, դիմակներ և ձեռնոց կրելը պարտադիր պահանջ կլինի:

«Ուստի կարևոր է ունենալ բավարար քանակությամբ դիմակներ և ձեռնոցներ, որոնք այս պահին մենք ի վիճակի ենք ապահովել», - հավելեց նա:

Հայաստանում մարտի 16–ին մեկ ամսով հայտարարվել էր արտակարգ դրության ռեժիմ կորոնավիրուսի տարածումը կանխելու նպատակով։ Մարտի 24–ից ապրիլի 12–ը գործում էին մարդկանց տեղաշարժի և տնտեսական գործունեության սահմանափակումներ։ Ապրիլի 13–ին կառավարությունը որոշեց մեկ ամսով երկարացնել արտակարգ դրության ռեժիմը` մինչև 2020թ.–ի մայիսի 14–ը ժամը 17։00–ն։

Մայիսի 3-ի, ժամը 11:00-ի դրությամբ Հայաստանում հաստատվել է կորոնավիրուսային հիվանդության ընդհանուր 2386 դեպք, որոնցից 1035-ն` առողջացած, 35-ը` մահվան ելքով:-0-