Հայաստանում կորոնավիրուսից 96-ամյա տղամարդ է բուժվել (ՖՈՏՈ)

ԵՐԵՎԱՆ, 23 մայիսի․ /Նովոստի-Արմենիա/․ Հայաստանում կորոնավիրուսից բուժվել է 96-ամյա՝ Ստեփանյան Սերյոժա անունով մի տղամարդ։ Այս մասին Facebook-յան իր էջում հայտնել է «Գրիգոր Լուսավորիչ» բժշկական կենտրոնի հանրային կապերի պատասխանատու Ծովինար Խաչատրյանը։
«96-ամյա Ստեփանյան Սերյոժան դուրս գրվեց Սուրբ Գրիգոր Լուսավորիչ բժշկական կենտրոնից: Նա մեր բուժկենտրոն էր տեղափոխվել նոր կորոնավիրուսով, չուներ այլ հիվանդություն»,- ասվում է գրառման մեջ։
Նշվում է, որ տուն գնալիս Սերյոժա պապիկն ասել է․ «Շնորհակալ եմ ինձ առողջացնելու համար, 96 տարեկան մարդ եմ, բժիշկն ասաց սիրտս 20 տարեկանի սիրտ է, բախտս բերեց, իմ ոտքով տուն եմ գնում: Թող բոլորն առողջ լինեն, զգույշ ու ուշադիր, դժվար է մեծերի համար հիվանդանոց ընկնելը»։

Մայիսի 23-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 6302 դեպք, որոնցից 2936-ն` առողջացած, 77-ը` մահվան ելքով:-0-