ՀՀ-ում կորոնավիրուսից հետո բուժվել է 14 քաղաքացի. ԱՆ

ԵՐԵՎԱՆ, 24 մարտի./Նովոստի-Արմենիա/. Մարտի 24-ի դրությամբ կորոնավիրուսից ապաքինվել է 14 քաղաքացի: Այս մասին քիչ առաջ հայտնել է ՀՀ առողջապահության նախարար Արսեն Թորոսյանը:

«Բուժվել է 14 քաղաքացի, որից 12-ը մեկուսացման մեջ եղած քաղաքացիներից, որոնց մոտ հաստատվել էր վիրուսը, բայց նրանք որևէ գանգատ չունեին և չէին հոսպիտալացվել, իսկ մյուս 2-ը Ինֆեկցիոն հիվանդանուցում բուժվող քաղաքացիներն էին (արդեն իսկ այսօր հայտարարված)։ Ինֆեկցիոն հիվանդանուցում բուժվող ևս 2 քաղաքացու մոտ վիրուսի տեստը բացասական է, վաղը կրկնելուց և բացասական պատասխանից հետո, նրանք նույնպես դուրս կգրվեն»,- գրել է նա իր Facebook-յան էջում:

Նա նաև հայտնել է, որ մեկուսացումից դուրս է եկել ընդհանուր 88 քաղաքացի` 37-ը իրենց շենքում մեկուսացվածներից (արդեն իսկ այսօր հայտարարված), իսկ 51-ը՝ հատուկ վայրում մեկուսացվածներից: 

Հիշեցնենք, որ ՀՀ-ում կորոնավիրուսով հաստատված դեպքերի թիվը հասել է 249-ի:-0-