ՀՀ սահմանային անցակետերում 172 մարդու մոտ կորոնավիրուս է կասկածվել (ՎԻԴԵՈ)

ԵՐԵՎԱՆ, 3 ապրիլի․ /Նովոստի-Արմենիա/․ Ապրիլի 3-ի դրությամբ, ՀՀ սահմանային յոթ անցակետերում, արտակարգ դրության շրջանակներում, 172 մարդու մոտ կորոնավիրուս է կասկածվել, նրանք հոսպիտալացվել են, ուրբաթ Միասնական տեղեկատվական կենտրոնում հայտնել է Առողջապահական և աշխատանքի տեսչական մարմնի ղեկավար Հակոբ Ավագյանը:

Նրա խոսքով, հունվարի 24-ից հայկական անցակետերը անցել են ուժեղացված հսկողական ռեժիմի: «Արտակարգ դրության առաջին իսկ օրվանից անապահով երկրներից եկած քաղաքացիներին տրամադրվում են անհատական հասցեական քարտեր», - ասաց Ավագյանը:

Ըստ նրա, որոշ դեպքերում այդ քարտերը նախապես տրվել են ավիաընկերություններին, որպեսզի ճանապարհին արդեն լրացվեն:


«Միաժամանակ, բոլոր անցակետերում իրականացվել են հեռահոր ջերմաչափում և արտաքին զննում: Կորոնավիրուսի ախտանիշների կամ առողջական բողոքների առկայության դեպքում կազմակերպվել է մարդկանց անհապաղ մեկուսացում կամ նրանց հոսպիտալացում», - ասաց նա:

Ինչպես նշել է Ավագյանը, ապրիլի 3-ի դրությամբ լրացվել է 24 հազար 170 հասցեական քարտ, և մարտի 19-ից ի վեր թողարկվել է 11 հազար 895 ինքնամեկուսացման ծանուցագրեր:

Մարտի 16-ից ապրիլի 14-ը Հայաստանում, կորոնավիրուսի տարածումը կանխելու նպատակով, գործում է արտակարգ դրություն: Արտակարգ դրության պայմաններում Հայաստանում ազատ տեղաշարժի և տնտեսական գործունեության որոշ տեսակների սահմանափակումները (նախկինում գործում էր մարտի 24-ից մարտի 31-ը) երկարաձգվել են մինչև ապրիլի 12-ը ներառյալ:

Հայաստանում ապրիլի 3-ի դրությամբ գրանցվել է կորոնավիրուսով վարակման 736 դեպք։ 43 մարդ բուժվել է։ Արձանագրվել է մահվան 7 դեպք:–0–