ՀՀ էկոնոմիկայի փոխնախարարը ներկայացրել է մայիսի 4-ից հանվող սահմանափակումները (ՎԻԴԵՈ)
ԵՐԵՎԱՆ, 1 մայիսի․ /Նովոստի-Արմենիա/․ ՀՀ էկոնոմիկայի նախարարի տեղակալ Վարոս Սիմոնյանը ներկայացրեց ՀՀ տարածքում գործող սահմանափակումների փորոխությունների փաթեթը, որը ուժի մեջ կմտնի ս․թ․ մայիսի 4-ից։
«Մասնավորոպես իրականացված աշխատանքների արդյունքում որոշում է կայացվելու, որ հանվելու է ազատ տեղաշարժի սահմանափակումները։ Միաժամանակ պահպանվելու է հանրային տրանսպորտի արգելքը։ Դա պայմանավորված է նրանով, որ կան որոշակի ռիսկային մոտեցումեր համավարակի տարածման հետ կապված»,- ասաց նա Միասնական տեղեկատվական կենտրոնում կայացած մամուլի ասուլիսի ժամանակ։
Այս փաթեթի շրջանակում հանվում են գրեթե բոլոր սահմանափակումները, մնում են որոշ սահմանափակումներ տնտեսական գործունեության տեսակների վերաբերյալ։ Մասնավորապես դրանք վերաբերելու են մանրածախ և մեծածախ առևտրին։
«Սահմանափակումները պահպանվելու են մանրածախ վաճառքի ոլորտում․ մոլերը և հանրախանութները փակ են լինելու։ Կգործեն միայն դրանց տարածքում գործող պարենային խանութները, դեղատները,, ինչպես նաև կգործեն գյուղատնտեսական արտադրատեսակների մասով շուկաները։ Բացվելու են նաև մշակող արդյունաբերության բոլոր տեսակները․ կբացվի տեքստիլի, կահույքի արտադրությունը, կոշիկի, պոլիգրաֆիական և այլ ենթաոլորտներ»,- ասաց փոխնախարարը։
Հանրային սննդի ոլորտում կաշխատեն այն ռեստորանները, սրճարանները և բարերը, որոնք ունեն բացօթյա տարածք։ Փակ տարածքներում սպասարկում չի իրականացվի։
Սիմոնյանի խոսքով՝ սպորտային օբյեկտների գործունեությունը կթույլատրվի, բացառապես, պրոֆեսիոնալ մարզիկների մասնակցությամբ, սպորտային միջոցառումների անցկացման համար, ինչպես նաև սպորտային ակումբների գործունեությունը։
Մայիսի 4-ից կթույլատրվի նաև անհատական ծառայություններից՝ լվացման, մաքրման և չոր մաքրման ծառայությունները, վարսավիրանոցների և գեղեցկության սրահների գործունեությունը։
Փոխնախարարը նշել է, որ թույլատրված ոլորտների համար կլինեն հատուկ ուղեցույցներ և սանիտարահիգիենիկ կանոններ։-0-
