ԱՀԿ–ն նշել է կորոնավիրուսի տարածման գլխավոր մեղավորներին

ԵՐԵՎԱՆ, 31 հուլիսի./Նովոստի–Արմենիա/. Առողջապահության համաշխարհային կազմակերպությունը հինգշաբթի զգուշացրել է, որ մի շարք երկրներում կորոնավիրուսի տարածման բռնկումներ են առաջացել այն պատճառով, որ երիտասարդները «խախտել են զգոնությունը»։

«Երիտասարդներն անպարտելի չեն», – առցանց ասուլիսի ժամանակ հայտարարել է ԱՀԿ ղեկավար Տեդրոս Գեբրեյեսուսը, հաղորդում է medikforum.ru–ն։

Չնայած համավարակը, որի հետևանքով վարակվել է ավելի քան 17մլն մարդ և մահացել է մոտ 670 հազարը, անհամեմատելի կերպով ազդել է տարեցների և այլ հիվանդություններ ունեցող մարդկանց վրա, ԱՀԿ ղեկավարն ընդգծել է, որ «երիտասարդները ևս ռիսկի տակ են»։


«Երիտասարդները կարող են վարակվել, կարող են մահանալ, կարող են փոխանցել վիրուսը», – ասել է նա։

ԱՀԿ ղեկավարը նշել է, որ կորոնավիրուսը սանձելու փորձի ժամանակ հիմնական խնդիրը պետք է լինի «համոզել երիտասարդներին, որ նրանք նույնպես ենթարկվում են ռիսկի»։

«Երիտասարդները պետք է նույնպես զգույշ լինեն, որպեսզի պաշտպանեն իրենց և մյուսներին», – ընդգծել է նա։

ԱՀԿ–ի կորոնավիրուսի գծով տեխնիկական ղեկավար Մարիա Վան Կերխովեն իր հերթին նշել է, որ բազմաթիվ երկրների գիշերային ակումբները դարձել են վիրուսի փոխանցման պատճառ։

ԱՀԿ–ի արտակարգ իրավիճակների գծով տնօրեն Մայքլ Ռայանը նշել է, որ մինչև հիմա շատ քիչ բան է հայտնի կորոնավիրուսի նույնիսկ ամենաթեթև ձևերի երկարաժամկետ հետևանքների մասին։

«Այս հիվանդությունը կարող է լինել թեթև, չափավոր, ախտահարել բազմաթիվ օրգաններ։ Մենք պարզապես չգիտենք, թե ինչպիսին կլինի վարակի երկարաժամկետ ազդեցությունը», – նշել է Ռայանը։–0–