ԵՐԵՎԱՆ, 30 նոյեմբերի. /Նովոստի–Արմենիա/. ՀՀ նախկին նախագահ Ռոբերտ Քոչարյանն ուրբաթ այցելել է Երևանում անցկացված «Լազարևյան ակումբի» առաջին նիստին։
ՌԴ Դաշնային խորհրդի պետական դումայի ԱՊՀ գործերով կոմիտեի նախագահի առաջին տեղակալ Կոնստանտին Զատուլինը հոկտեմբերին ՀՀ ԱԺ խոսնակ Արա Բաբլոյանի հետ հանդիպման ժամանակ հանդես էր եկել Հայաստանի հետ համագործակցության նոր հարթակի` «Լազարևյան ակումբի» ստեղծման նախաձեռնությամբ։
Իր ելույթի ընթացքում Քոչարյանն անդրադարձել է Հայաստանի և Ռուսաստանի երկկողմ հարաբերություններին։
Առանձնահատուկ հոգատարություն
«Հայ–ռուսական հարաբերություններն առանձնահատուկ հոգատարության կարիք ունեն։ Զգալի սպառնալիք են ներկայացնում Հայաստանի և հայության համար ավանդական դարձած աշխարհաքաղաքական առաջնահերթությունների վերանայման` ուղիղ կամ անուղղակի կոչերը, անգամ եթե դրանք դեռ կյանքի չեն կոչվել», – ասաց նա։
Այս կապակցությամբ Քոչարյանը հայտարարեց, որ տեղեկատվական տեխնոլոգիաներն ու սոցիալական ցանցերն այսօր մեծ հնարավորություններ են ընձեռում հասարակական տրամադրության մանիպուլյացիայի համար։
«Դրանք թույլ են տալիս մեր հասարակություններում ներառել միմյանց նկատմամբ կասկածի և անվստահության տարրեր, ինչն անհապաղ կհանգեցնի մեր բազմամյա կապերի էրոզիայի», – նշեց նախկին նախագահը։
Ե՞րբ է ավարտվում բարեկամությունը
«Ցանկացած բարեկամություն պահանջում է ջանքեր, այն առնվազն ունի մեր էներգիայի, ժամանակի և էմոցիաների կարիքը։ Բարեկամությունն, իհարկե, ունի նաև իներցիա, սակայն միայն դրանով չի կարող զարգանալ և կայուն լինել։ Հիշեք, թե որքան շատ ընկերներ ենք մեր կյանքում կորցրել, քանի որ չենք գործադրել բավարար ջանք` պահպանելու համար»,– նշեց Քոչարյանն` ավելացնելով, որ բարեկամությունը երկկողմանի երթևեկությամբ փողոց է։
«Բարեկամությունը դադարում է այն ժամանակ, երբ հայտնվում են կասկածներ անկեղծության, ընկերների մտադրությունների հարցում, և երբ կողմերից մեկը ձգտում է ստանալ ավելի շատ, քան պատրաստ է տալ», – ասաց երկրորդ նախագահը։
Հայ–ռուսական աննախադեպ հարաբերությունները
«Դժվար է և ձեռնտու չէ բարեկամություն անել միշտ խնդրողների, աներեսների և տրտնջողների հետ։ Նման հարաբերությունները միշտ վերափոխվում են` դառնալով վասալային կամ նյարդայնացնող։ Դա ճշմարիտ է ոչ միայն անձնական, այլև միջպետական հարաբերություններում։ Հենց այստեղ`միջպետական հարաբերություններում, մենք պետք է լինենք հասկանալի, կանխատեսելի, հուսալի և պետքական գործընկերներ միմյանց համար», – հայտարարեց երկրորդ նախագահը։
Նա նաև ընդգծեց, որ Հայաստանի և Ռուսաստանի բարեկամական հարաբերությունները պետական շահերի սինթեզ է և մարդկային գործոնի խորը ներթափանցում երկու հասարակությունների փոխհարաբերություններում։
«Ես չեմ կարող գնտել այլ երկրների օրինակ, որոնք ունեն այդ գործոնների այդքան ուժեղ համադրություն, ինչպես Հայաստանի և Ռուսաստանի դեպքում է։ Պարզապես նայեք քարտեզին, գրեթե չկան նման օրինակներ։ Այդ հարաբերությունները մենք ժառանգել ենք և պետք է գործադրենք ամենօրյա ջանքեր` դրանք պահպանելու և զարգացնելու համար», – ընդգծեց նա։
Ռոբերտ Քոչարյանը նաև նշեց, որ կցանկանար, որպեսզի «Լազարևյան ակումբը» դառնար նման գործունեության առանցքային գործիքներից մեկը, ինչպես նաև պատրաստակամություն հայտնեց ավելի մեծ ծավալով մասնակցել հետագա նիստերին։–0–
