Աշտարակի խճուղում բռնկված հրդեհը մեկուսացվել է․ դեպքի վայրում 4 մարտական հաշվարկ է աշխատել
20.08.2026,
20:51
Նախնական տվյալներով՝ այրվում է մոտ 2 հա խոտածածկույթ և անվադողերի վուլկանացման կետ՝ օգտագործված անվադողերով
ԵՐԵՎԱՆ, 20 օգոստոսի․/Նովոստի-Արմենիա/․ Օգոստոսի 20-ին՝ ժամը 19։19-ին, ՆԳՆ 112 օպերատիվ կառավարման կենտրոն ահազանգ է ստացվել, որ Երևան քաղաքի Աշտարակի խճուղու հասցեներից մեկի մոտակայքում այրվում է խոտածածկ տարածք։
Ինչպես հայտնում է ՆԳՆ Փրկարար ծառայությունը, դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ, Հրդեհաշիջման և փրկարարական աշխատանքների կազմակերպման բաժնի ու Հոգեբանական աջակցության և բժշկական ապահովման վարչության հերթապահ խմբերը։
Նախնական տվյալներով՝ այրվում է մոտ 2 հա խոտածածկույթ և անվադողերի վուլկանացման կետ՝ օգտագործված անվադողերով։
Հրշեջ-փրկարարներին հաջողվել է մեկուսացնել հրդեհը ժամը 20։12-ին։
Պատճենել հղումը
