Գյումրիում 66–ամյա տղամարդը, կարծելով, թե կորոնավիրուսով է վարակվել, քացախաթթվի լուծույթ է խմել

ԵՐԵՎԱՆ, 10 ապրիլի./Նովոստի–Արմենիա/. Գյումրի բժշկական կենտրոն այսօր տեղափոխվել է 66–ամյա տղամարդ, որը կարծելով, թե կորոնավիրուսով է վարակվել, քացախաթթվի լուծույթ է խմել։

Այս մասին հաղորդում է news.am-ը`հղում անելով Գյումրու ԲԿ–ի փոխտնօրեն Արմեն Խաչատրյանին։

Նրա խոսքով՝ տղամարդն ասել է, որ վերջերս է վերադարձել Ռուսաստանից։

«Բժիշկներին ասել է, որ մարտի 28–ին է Ռուսաստանից եկել և տանը մեկուսացված է եղել, իրեն վատ է զգացել, կարծելով, որ կորոնավիրուս է, խմել է քացախաթթվի էսենցիա, մտածելով որ դա կօգնի», – նշել է փոխտնօրենը։

Խաչատրյանի խոսքով՝ տղամարդուն թեստավորել են, սպասում են պատասխանին։

«ՀՎԱԿ–ի Գյումրու մասնաճյուղի աշխատակիցները եկան, նմուշ վերցրեցին, գնացին, պատասխանները էլեկտրոնային տարբերակով կիմանանք։ Նրա հարազատները ուզում էին, որ Երևան տեղափոխեն, մենք վիճակը ստաբիլացնելուց հետո շտապբուժօգնության մեքենայով տեղափոխել ենք Երևան», – ասել է Խաչատրյանը։–0–