ԵՐԵՎԱՆ, 11 ապրիլի./Նովոստի–Արմենիա/. WikiLeaks–ի հիմնադիր Ջուլիան Ասանժը կալանավորվել է բրիտանական ոստիկանության կողմից։
Այս մասին հաղորդում է lenta.ru–ն` հղում անելով Reuters–ին։
«Այսօր` ապրիլի 11–ին, 47–ամյա Ջուլիան Ասանժը կալանավորվել է ոստիկանության աշխատակիցների կողմից Էկվադորի դեսպանատանը», – ասված է հայտարարության մեջ։
Նշվում է, որ ոստիկաններին դեսպանատուն է հրավիրել դեսպանը։ Դրանից առաջ Էկվադորը հրաժարվել է ապաստան տրամադրել Ասանժին։
Ինչպես հաղորդվում է, WikiLeaks–ի հիմնադիրը գտնվում է կալանքի տակ Լոնդոնի կենտրոնում։
Ասանժն ավելի քան 6 տարի բնակվում էր Լոնդոնում գտնվող Էկվադորի դեսպանատանը։ Այդ ընթացքում երկրի իշխանություններն Ասանժի անվտանգության համար ծախսել են առնվազն 5 մլն դոլար։
Ասանժն ապաստան էր խնդրել 2012թ.–ին` վախենալով, որ իրեն կհանձնեն Շվեդիայի իշխանություններին, որտեղ նրան բռնաբարության մեղադրանք են առաջադրել։ 2017թ.–ի մայիսին քննությունը դադարեցվել էր, սակայն Ասանժը շարունակում էր վախենալ, որ իրեն կհանձնեն Շվեդիայի իշխանություններին, քանի որ Ստոկհոլմը կփոխանցի նրան ԱՄՆ–ին, որտեղ նրան կարող է սպառնալ մահապատիժ Պենտագոնի գաղտնի փաստաթղթերը հրապարակելու համար։ –0–