ԵՐԵՎԱՆ, 23 հոկտեմբերի. /Նովոստի–Արմենիա/. Հաջող ստարտափի և բիզնեսի առաջխաղացման սեփական բանաձևն է ներկայացրել գործարար, «Այբ» կրթական հիմնադրամի համահիմնադիր Դավիթ Յանը Երևանում վարպետության դասերի ժամանակ։
Չինացու և հայի ընտանիքում ծնված Դավիդ Յանը ABBYY տեխնոլոգիական կայսրության հիմնադիրն է, երիտասարդության համար նախատեսված առաջին պորտատիվ համակարգչի (Cybiko) մշակողն է, ռեստորանային և հյուրանոցային բիզնեսի կառավարման նորարարական համակարգի (iiko) և առցանց վճարումների հարթակի (Platius) ստեղծողը։
«Խնդրի ըմբռնումը, դրա լուծումը գտնելու ընդունակությունը և սպառողին սեփական պրոդուկտը հասցնելու հնարավորությունը յուրաքանչյուր սկսնակ ձեռնարկատիրոջ հաջողության գաղտնիքն է»,– ասել է նա։
Յանի խոսքով, եթե ստարտափերները պատասխանում են այս երեք վերոնշյալ բաղադրիչներից գոնե երկուսին, ապա ստարտափը հաջողված կլինի, իսկ եթե նրանք չեն հասկանում իրենց առաջ դրված խնդիրը, ապա գաղափարը չի իրագործվի կամ էլ ցանկալի արդյունքի չի բերի։
Գործարարը կարծում է, որ ցանկացած գործի հաջողությունը նաև որոշվում է թիմով։
«Ներդրողները միշտ ներդնում են թիմի համար, որը վարելու է բիզնեսը։ Եթե թիմն ակտիվ է, շուկան գիտի, ընդունակ է արագ և օպերատիվ որոշումներ կայացնել, ապա այդ բիզնեսն ունի հաջողության հասնելու բոլոր հնարավորությունները»,– ասել է Յանը։ -0-